Almatyda zańsyz satylǵan 73 myń bótelke ishimdik tárkilendi
ALMATY. QazAqparat - Almatyda iri sýpermarkette ishimdik ónimderi zańsyz satylyp kelgen, dep habarlaıdy QazAqparat tilshisi qalalyq Memlekettik kirister departamenti baspasóz qyzmetine silteme jasap.
Kóleńkeli ekonomıkaǵa qarsy kúres aıasynda Departament qyzmetkerleri sońǵy 4 kúnde Almatyda quny 22,3 mln teńge bolatyn zańsyz saýdalanǵan 73 myń bótelke ishimdik tárkiledi.
Atap aıtqanda, Bostandyq aýdanynda ornalasqan sýpermarketterdiń birinde arnaıy lıtsenzııasyz ári ruqsat berý qujattarynsyz araq satylyp kelgeni belgili boldy.
Munda quny 5 mln teńge bolatyn, 4,2 myń bótelke araq tárkilendi.
Endi saýda úıiniń basshylaryna qatysty QR QK 214-baby boıynshy qylmystyq is qozǵaý máselesi qarastyrylyp jatyr.
Sonymen qatar, Almaly aýdanynda ornalasqan Barys bazarynda da arnaıy lıtsenzııasyz satylyp otyrǵan 14 myń bótelke ishimdik anyqtaldy. Olar da zańsyz saýdalanǵan», - dedi qalalyq MKD basshysynyń orynbasary Qanat Baltabekov.
Departament mamandary alkogolldi ónimderdi arnaıy qujatsyz saýdalaǵan adamǵa qylmystyq jaýapkershilik qarastyrylǵanyn aıtty.
Qala turǵyndary kúmán týǵyzatyn ónimderdi kórgende 8 727- 267 69 29, 267 69 37 telefondaryna habarlasýyn suraıdy. 
