Almatyda zańsyz salynǵan jataqhana buzyldy
ALMATY. QazAqparat - Almatynyń Alataý aýdanynda zańsyz salynǵan úsh qabatty jataqhana buzyldy, dep habarlaıdy QazAqparat tilshisi.
Qala qurylysyn baqylaý basqarmasyna «Samǵaý» yqshamaýdanynyń turǵyndarynan úsh qabatty jataqhana ıesine shara qoldaný týraly ótinish tústi.
Tekserý barysynda jer teliminiń ıesi jekemenshik turǵyn úı qurylysyna berilgen aýmaqta konteıner bloktardan jalpy aýdany 387 sharshy metr bolatyn úsh qabatty jataqhana qurylysyn júrgizgeni anyqtaldy.
«Ǵımarat jobalyq-smetalyq qujattamasyz, tıisti saraptamasyz, tehnıkalyq jáne arhıtektýralyq qadaǵalaýsyz, memlekettik sáýlet-qurylys baqylaýy men qadaǵalaýyn júzege asyratyn organdarǵa eskertýsiz turǵyzyldy», - dep habarlady basqarmadan.
Sondaı-aq, jer ýchaskesiniń shyǵys jaǵynada aýmaǵy 0, 0067 ga bolatyn memleket menshigindegi jerdi zańsyz ıemdenip ol jerge de konteınerlerden eki qabatty ǵımarat salǵan.
Almaty qalasynyń mamandandyrylǵan aýdanaralyq ákimshilik sotynyń qaýlysymen ǵımarat ıesi ákimshilik quqyq buzýshylyq jasaǵany úshin kináli dep tanyldy.
«Basqarma Almaty qalasynyń Alataý aýdandyq sotyna zańsyz salynǵan úsh qabatty jataqhana men zańsyz turǵyzylǵan eki qabatty ǵımaratty buzý týraly aryz túsirgen bolatyn. Sot buzý týraly sheshim qabyldap, jer ıesine jalpy somasy 669 125 teńge aıyppul saldy», - dep habarlady Qala qurylysyn baqylaý basqarmasy.
