Almatyda zańsyz salynǵan nysandar súrilip jatyr
ALMATY. QazAqparat- Almatynyń ortalyǵynda zańsyz salynǵan nysan súrildi. Bul týraly qalalyq sáýlet-qurylys baqylaý basqarmasy málim etti, - dep habarlaıdy QazAqparat tilshisi.
Almaty qalalyq sáýlet-qurylys baqylaý basqarmasy málim etkendeı, qala turǵyny nysandy eshqandaı ruqsatsyz, óz qalaýymen turǵyzǵan. Nysan Radostovets kóshesinde ınjenerlik kommýnıkatsııalardyń ústine salynǵan.
«Qurylys kóptegen normaǵa saı kelmeıdi. Sot talqylaýlary barysynda bizdiń talap aryzdarymyz qanaǵattandyryldy. Naqty sheshim shyqqannan keıin nysandy buzýǵa kiristik», - dep habarlady basqarmadan.
Sondaı-aq, vedomstvodaǵylar menshik ıesin QR Ákimshilik quqyq buzýshylyq týraly kodeksiniń 316-baby 1-bóligi, 321-baby, 323-baby jáne 463-babynyń 1-bóligi boıynsha ákimshilik jaýapqa tartqanyn atap ótti.
Buǵan deıin Qarasaı batyr men Áıtıev kósheleriniń qıylysyndaǵy kólik jýý orny men birneshe kommertsııalyq nysandardyń buzylǵany týraly jazǵan bolatynbyz.
