Almatyda zańsyz saqtalǵan qarýdy izdestirý jáne tárkileý sharasy jalǵasady
ALMATY. QazAqparat - Almatyda 7 aqpannan bastap erekshe ókim shyqqanǵa deıin «Qarý» jedel aldyn alý sharasy ótedi, dep habarlaıdy QazAqparat tilshisi.
Almaty qalasy polıtsııa departamentiniń bastyǵy Qanat Taımerdenovtiń aıtýynsha, is-sharanyń maqsaty – jedel jaǵdaıdy jaqsartý, atys qarýy men oq-dárilerdi qoldaný arqyly jasalǵan qylmystardyń aldyn alý jáne ashý.
«Tájirıbe kórsetkendeı, mundaı is-sharalar megapolıste qylmystyq jaǵdaıdy jaqsartýǵa oń áser etedi. Almaty polıtsııasynyń jeke quramy qyzmettiń kúsheıtilgen rejımine aýystyryldy. «Qarý» jedel aldyn alý is-sharalary tirkelmegen qarýdyń maksımaldy sanyn zańsyz aınalymnan shyǵarýǵa múmkindik beredi», – dedi qalalyq polıtsııa departamentiniń bastyǵy.
Ol sondaı-aq is-shara aıasynda azamattyq qarýdyń jeke ıelerin qarý saqtalǵan ǵımarattarda qaýipsizdik júıesiniń bar-joǵy jáne qoldanylýyna tekseriletinin aıtty.
«Almaty polıtsııasy qarýdy qabyldaý naýqanyn ótkizip jatqanyn eske salamyz. Zańsyz qarýy bar azamattarǵa, olardy óz erkimen tapsyrýǵa múmkindik beriledi. Bul rette, qarý men oq-dárilerdi tapsyrǵan adamdar, eger olardyń qandaı da bir qylmysqa qatysy anyqtalmasa, qylmystyq jaýapkershilikten bosatylady. Sonymen qatar, zańsyz saqtalǵan qarý-jaraq pen oq-dárilerdi óz erkimen tapsyrmaǵan azamattar tabylǵan jaǵdaıda qylmystyq jaýapkershilikke tartylatynyn eskertemiz», – dep túıindedi Qanat Taımerdenov.
