Almatyda zańsyz oıyn bıznesiniń 178 oshaǵy joıyldy

Qazirgi tańda ІІD-niń arnaıy saqtaý qoımasynda sot sheshiminen keıin joıylýǵa tıis taǵy 3 myńnan astam oıyn avtomaty saqtaýly tur.

Jalpy jyl basynan beri tájirıbeli jedel ýákilderden jasaqtalǵan arnaıy top 178 zańsyz oıyn oshaqtarynyń jolyn kesip, myńnan asa oıyn apparattaryn tárkilegen bolatyn.  Almaty qalasy ІІD Uıymdasqan qylmysqa qarsy kúres Basqarmasy bastyǵynyń orynbasary Samýtdın Ábdiqaıymovtyń aıtýynsha,  «Oıyn bıznesi týraly» zańnyń kúshine engenine qaramastan Almaty qalasynda áli kúnge deıin jasyryn oıynhanalar jumysy astyrtyn jalǵasýda. Qapshaǵaı men Şýche qalalarynda ǵana oınaýǵa ruqsat etilgen úkimettiń tilek-talaptaryna boı usynbaǵan keıbir kásipkerler onda júldege uıaly baılanys kartochkalaryn, utys bıletterin, janarmaı talondaryn taǵaıyndap kelgen. Ústimizdegi jyldyń 1 qańtarynan bastap kúshine engen salyq zańnamalaryna sáıkes, oıyn oshaqtaryndaǵy klıentterge zattaı nemese basqa da múliktik qajettilikterdi syıaqy retinde utyp alýǵa tolyǵymen tyıym salyndy.

«Tárkilengen zańsyz oıyn apparattaryn joıý aktsııasy  zańsyz oıyn bıznesimen aınalysatyndarǵa úlken sabaq bolatynyna senimdimiz. Árbir oıyn avtomatynyń quny búgingi tańda 5-10 myń AQSh dollary arasynda baǵalanady. Reıd kezinde tárkilengen barlyq oıyn apparattary ekinshi ret qaıta qoldanbaý  úshin tolyǵymen joıylyp, zańsyz oıyn bıznesin uıymdastyrǵan tulǵalar qatań jaýapkershilikke tartylady. Osy oraıda, biz qala turǵyndarynan zańsyz oıyn bıznesiniń kýási bolǵan jaǵdaıda Almaty qalasy ІІD-niń myna senim telefondaryna (263-36-36; 263-38-38; 254-40-41) habarlasýyn suraımyz», - deıdi polkovnık S. Ábdiqaıymov.
Onyń sózine qaraǵanda, jyl basynan beri qala polıtseıleri zańsyz aınalymnan 1 myńnan asa oıyn apparattaryn, 1 elektrondyq rýletka, 1 «orys rýletkasynyń» ústelin, 19 poker oıyny ústelin, 840 660 teńge aqshalaı qarajat, sondaı-aq, 1 myń 100 AQSh dollaryn tárkiledi. Sonymen qatar zańsyz aınalymnan 17 937 arnaıy fıshkalar, 21 poker-kýpondar, 1 elektrondy kilt alyndy.