Almatyda zańsyz oıyn bıznesinen 23 myń dollar tárkilendi
ALMATY. QazAqparat - Almaty qalalyq Memlekettik kirister departamentiniń Ekonomıkalyq zertteý qyzmeti 3 uıymdasqan qylmys tobyn ustady. Bul toptar zańsyz oıyn bıznesimen aınalysyp kelgen, dep habarlaıdy QazAqparat tilshisi.
Atap aıtqanda olar saýda ortalyqtary, sýpermarketter, dúkenderdiń aldynda jalǵan lotereıalyq elektrondy termınaldar ornatqan.
Sonymen qatar Almaty qalasynda zańsyz oıyn zaldaryn ashqan qylmystyq top áshkerelendi.
Atalǵan derekter boıynsha QR QK-niń 262-baby boıynsha «Uıymdasqan qylmystyq top qurý, top quramynda áreket etý» degen aıyppen sotqa deıingi tergeý jumystary bastaldy.
Odan bólek 4 astyrtyn kazıno, 31 zańsyz oıyn mekemesiniń qyzmeti shekteldi, 26 qylmystyq is qozǵaldy.
Kóleńkeli aınalymnan jalpy alǵanda, 180 elektrondy oıyn termınaly, 23 myń AQSh dollary, 6,5 mln teńge, 4 poker ústeli, oıyn kartasy men fıshkalar tárkilendi.
EZQ ókilderi Almaty boıynsha 29 oıyn zalynyń jumysyn toqtatty.
Tekserý barysynda «Bıngo-37», «888» baǵdarlamalary ornatylǵan 400-den astam oıyn kompıýteri, 3 316 000 teńge, 40 oıyn avtomaty, 40 fleshkarta tárkilendi. Qazir atalǵan derek boıynsha is materıaldary Almaly aýdandyq sotyna jiberildi.
Aıta ketý kerek, QR Oıyn bıznesi týraly zańnama boıynsha bul bıznesti tek Almaty oblysyndaǵy Qapshaǵaıda jáne Aqmola oblysyndaǵy Şýchınsk aýdanynda júrgizýge ruqsat etilgen.
QR Lotereıa jáne lotereıalyq qyzmet týraly zań boıynsha lotereıa oıyndaryn arnaıy lıtsenzııasy bar operatormen birigip júrgizýge bolady. QR Úkimetiniń qaýlysymen lotereıa oıyndaryn júrgizýge «Sátti Juldyz» AQ-ǵa ǵana lıtsenzııa berilgen. Kez-kelgen lotereıa qyzmetine «Sátti Juldyz» AQ qatysy bolmasa, ol zańsyz bolyp tabylady.
