Almatyda zańsyz oıyn bıznesin uıymdastyrǵan Grýzııanyń eki azamaty sottaldy
Jedel-tergeý sharalary barysynda kompıýterlik klýb qyzmeti túrinde zańsyz oıyn bıznesin birneshe ret uıymdastyrý faktisi anyqtaldy.
«Bul mekeme QR «Oıyn bıznesi týraly» zańynyń normalaryna qaıshy jumys istegen. Іs - sharalar barysynda kóleńkeli aınalymnan «onlaın kazıno» úshin tyıym salynǵan bıznes túrin uıymdastyrýǵa múmkindik beretin qosymshalarymen, atap aıtqanda stavkalardy qabyldaý, utystardy esepteý jáne berý fýnktsııalaryn qoldaıtyn onlaın qumar oıyndary bar 42 oıyn kompıýteri tárkilenip alyndy»,- dep habarlady Almaty qalasy boıynsha ekonomıkalyq tergeý departamentiniń baspasóz qyzmeti.
Buǵan deıin osy mekenjaıda 62 oıyn kompıýteri men 3 oıyn termınaly tárkilenip, osy tulǵalar uıymdastyrǵan oıyn zalynyń zańsyz qyzmetiniń joly kesilgen bolatyn.
«Grýzııanyń eki azamaty QR QK 307-babynyń 3-bólimi 2-tarmaǵy (asa iri mólsherde tabys tabýmen zańsyz oıyn bıznesin uıymdastyrý) boıynsha qylmys jasaǵany úshin kináli dep tanylyp, 4,6 jylǵa bas bostandyǵynan aıyryldy», - dep atap ótti basqarmadaǵylar.
Budan basqa, sotta zańsyz oıyn bıznesi úshin úı-jaıdy jalǵa berýshige qatysty sotqa deıingi tergeý qarastyrylýda.
Aıta keteıik, Almaty qalasy boıynsha ekonomıkalyq tergeý departamenti «Stop-oıyn» jedel-profılaktıkalyq sharasy aıasynda qala aýmaǵyndaǵy zańsyz oıyn oryndaryn joıý úshin reıd júrgizip jatyr.
