Almatyda zańsyz qorshaý salǵany úshin 1000 adam jaýapkershilikke tartyldy
ALMATY. QazAqparat - Almaty polıtsııasy qaladaǵy zańsyz qorshaý turǵyzǵan tulǵalardy anyqtaý jumystaryn jalǵastyrýda. Bostandyq aýdandyq jergilikti polıtsııa qyzmeti osy ýaqytqa deıin 682 zańsyz qorshaýdy buzǵan.
Polıtsııanyń habarlaýynsha, jyl basynan beri 1000 adam jaýapkershilikke tartylǵan. Olardyń 47-si zańdy tulǵalar.
Olarǵa barlyǵy 4 mln teńge kóleminde aıyppul salyndy.
«Ókinishke oraı senip tapsyrylǵan terrıtorııasynda zań erejelerin saqtaý kerektigin kóbi bile bermeıdi. Bul úshin QR ÁqK 505 baby boıynsha jaýapkershilik qarastyrylǵan. Jaqynda bir JShS qyzmetkerleri qoqys toly qaptardy qorshaý retinde paıdalanyp kelgen. Sondaı-aq, baqsha otyrǵyzý maqsatynda trotýarǵa topyraq tókken. Bul júrginshilerge kedergi keltiredi. Kompanııa basshylyǵyna 30 AEK kóleminde aıyppul salynyp, qazir aıyppul óteldi», - dedi Bostandyq aýdandyq JPQ qorshaǵan ortany qorǵaý polıtsııasynyń basshysy Qýanysh Jaısańbaev.
Onyń aıtýynsha, jeke tulǵalar kóbine úıiniń mańyndaǵy aımaqty jeke avtoturaq etip qorshap alady. Lokaldy reıdtiń alǵashqy saǵattarynda-aq, 68 qorshaý buzylyp, 26 hattama toltyryldy.
