Almatyda zańsyz kesilgen aǵashtar: Prokýror kinálini 4 jylǵa bas bostandyǵynan aıyrmaq
ALMATY. QazAqparat - Almatyda Sulpak dúkeni aldyndaǵy aǵashtardy kesý isi boıynsha sot otyrysy ótti, dep habarlaıdy QazAqparat tilshisi.
Sot otyrysynda memlekettik aıyptaýshy sýdıadan kinálige bas bostandyǵyn aıyrý jazasyn taǵaıyndaýdy surady.
«Aıyptalýshy bul jumyspen jyldar boıy aınalysyp keldi. Ol jasyl jelekterdi kesýge tyıym salý týraly zańdy bilýi kerek. Probatsııalyq baqylaý ornatyp, kásipkerlik qyzmetpen aınalysý quqyǵynan aıyrýdy jáne 4 jylǵa sottaýdy suraımyn», - dedi prokýror.
Sottalýshy óz kinásin ishinara moıyndap, sottan 339-bapty 340- bapqa aýystyrýdy surady.
«Meniń kámeletke tolmaǵan balalarym jáne qart ata-anam bar, bul sheshim olar úshin úlken soqqy bolady. Almaty turǵyndarynan jasaǵan isim úshin keshirim suraımyn. Muny eskerýińizdi ótinemin, qurmetti sýdıa. Keshirińiz!. Men endi ne istegenimdi túsindim. Men áli jaspyn, sondyqtan Almaty úshin kóp nárse isteýge tyrysamyn. Aǵash otyrǵyzamyn, kógaldandyrý jumystaryna atsalysamyn. Men ózimdi aqtap jatqan joqpyn. Biraq sizden jazany jeńildetýińizdi suraımyn. Meniń kishkentaı balalarym bar, menen basqa olardy tárbıeleıtin eshkim joq «, - dedi Janna Nurtaeva
Eske salaıyq, byltyr 23 qarasha kúni Almatyda saýda úıiniń janyndaǵy jaıqalǵan emen men qaraǵash otaldy. Bul týraly turǵyndar áleýmettik jelide narazylyq bildirdi.
Keıin Almaty qalalyq jasyl ekonomıka basqarmasy saýda úıiniń aldyndaǵy aǵashtardyń jappaı kesilýiniń mán-jaıyn anyqtady.
Prezıdent Qasym-Jomart Toqaev Almaty qalasy Tóle bı kóshesindegi aǵashtardyń otalǵanyna qatysty jaǵdaıǵa nazar aýdardy.
Memleket basshysy Almaty ákimi Baqytjan Saǵyntaevqa atalǵan jaǵdaıǵa baılanysty qyzmettik tekserý júrgizip, kinálilerdi jaýapqa tartýdy tapsyrdy.
Al, bıylǵy jyldyń naýryzynda Sulpak dúkeni aldyndaǵy aǵashtardyń otalýyna qatysty is sotqa berildi.
