Almatyda zańsyz dúńgirshikter súriledi
ALMATY. QazAqparat - Almaty qalasynda kóshe saýdasyn retke keltirý maqsatynda stantsıonarlyq emes saýda nysandary súriledi, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasaı otyryp.
«Almaty qalasynda kóshe saýdasyn retke keltirý maqsatynda stantsıonarlyq emes saýda nysandarynyń qazirgi jaǵdaıy saralandy, álemdik tájirıbege den qoıylyp, tıisti jospar jasaldy. Osyǵan oraı, stantsıonarlyq emes saýda nysandary súriledi», delingen habarlamada.
Qalalyq ákimdiktiń habarlaýynsha, mundaı dúńgirshik ıeleriniń zańdy qujattary joq. Saýda nysandary trotýarlardyń, gazondardyń, saýdaǵa laıyq emes jerlerdiń boıyna ornalasqan jáne qala turǵyndarynyń narazylyǵyn týǵyzyp keledi.
«Zańsyz dúńgirshikter órt, sanıtarlyq-epıdemıologııalyq qaýipsizdik talaptaryna jaýap bermeıdi ári qalany abattandyrý erejesine saı emes. Olardyń ıeleri keı rette elektr jelisine zańsyz qosylyp, salyq tólemeıdi», delingen habarlamada.
2015 jyly 368 obekti, 2016 jyly 470, al bıylǵy jyldyń basynan beri 300-den astam osyndaı zańsyz dúńgirshikter súrildi.
