Almatyda zańsyz aınalymnan iri kólemdi geroın tárkilendi
ALMATY. 27 maýsym. QazAqparat - Almatyda zańsyz aınalymnan iri kólemdi geroın tárkilendi, dep habarlady qalalyq ІІD-niń baspasóz qyzmeti.
Arnaıy operatsııa jýyrda keshke qaraı qalalyq esirtki bıznesimen kúres departamentiniń qyzmetkerlerimen iske asyryldy. «Bizdiń qyzmetkerlerimiz kúdikti er adamnyń sońyna túsip, birneshe apta boıy tekserý amaldaryn júrgizdi. 58 jastaǵy er adamdy tintý kezinde anyqtalǵandaı, ol turaqty túrde esirtki bıznesimen aınalysqan. Esirtki satýda is-áreketterin júzege asyrý úshin ol shet aımaqtaǵy aýyldan Almaty qalasyna kelip turǵan. Esh kúmán keltirmes úshin esirtki zattaryn kúndiz, úıdiń aýlalarynda satatyny belgili boldy. Ol óziniń «ádettegideı jumys kúninde», iri kólemde esirtki satpaq bolǵan jerinde ustaldy», - dedi Almaty ІІD Esirtki bıznesimen kúres basqarmasynyń podpolkovnıgi Denıs Loskýtov.
Er adam buǵan deıin qylmystyq jaýapkershilikke tartylmaǵan.
«800 grammnan astam aq untaq ortasha syıymdylyqtaǵy 10 pakettiń ishine salynǵan. Qazirgi ýaqytta biz T. esimdi azamattyń jeke tulǵasyn muqııat tekserip, qarastyrýdamyz. Biz onyń aralasqan ortasyn tekserý arqyly sybaılastaryn jáne esirtki zattaryn qaıdan alǵanyn anyqtaımyz. QR QK-niń 259 baby 4 bólimine sáıkes qylmystyq is qozǵaldy. Kúdikti ýaqytsha ustaý abaqtysyna qamaldy», - dedi ol.
