Almatyda zańgerler Prezıdent Joldaýyndaǵy quqyq qorǵaý aspektilerin talqylady
Joldaýdy talqylaýǵa arnalǵan shara onlaın formatta ótti.
QR Prezıdenti janyndaǵy Adam quqyqtary jónindegi komıssııanyń tóraǵasy, QR Tuńǵysh Prezıdenti – Elbasy Qorynyń atqarýshy dırektorynyń orynbasary Igor Rogov qatysýshylarǵa dóńgelek ústeldiń mańyzdylyǵy týraly aıtty.
«Qoldanystaǵy QR Konstıtýtsııasynyń avtory jáne ázirleýshisi elimizdiń Tuńǵysh Prezıdenti Nursultan Ábishuly Nazarbaev Qazaqstan Respýblıkasy demokratııalyq, quqyqtyq, zaıyrly, áleýmettik memleket ekenin aıqyndap berdi. Onda adam, onyń ómiri, quqyqtary men bostandyǵy eń joǵary qundylyq ekeni naqty jazylǵan. Táýelsizdiktiń 30 jylynda respýblıkada kóptegen jumys atqaryldy. Prezıdent Qasym-Jomart Kemeluly Toqaev júrgizip otyrǵan saıasat bizdiń Tuńǵysh Prezıdentimizdiń qalyptasqan damý vektorynyń jalǵasy ekeni bárine túsinikti dep oılaımyn»,-dedi ol.
Igor Rogov sońǵy kezderi adam quqyǵy ózekti taqyrypqa aınalǵanyń atap ótti. Ásirese, pandemııa men shekteýler jaǵdaıynda.
Sonymen qatar, ol Qasym-Jomart Kemeluly Toqaev bıyl quqyq salasyndaǵy qyzmettiń baǵytyn anyqtaý úshin prıntsıpti mańyzy bar birneshe akti shyǵarǵanyn tilge tıek etti.
Moderator halyqqa tegin quqyqtyq kómek kórsetetin «Meıirimdilik akseleratory: Izgilik elshisi», eriktiler qozǵalysynyń jumysyn joǵary baǵalady.
Aıta keteıik, sharaǵa QR Prezıdenti Ákimshiliginiń Qaýipsizdik jáne quqyqtyq tártip bóliminiń meńgerýshisi Alekseı Kalaıchıdı, QR Ádilet Vıtse-mınıstri Natalıa Pan, «Almaty Adaldyq alany» joba keńsesiniń jetekshisi zań ǵylymdarynyń doktory, professor Aınur Sábıtova, ál-Farabı atyndaǵy Qazaq ulttyq ýnıversıteti zań fakýltetiniń dekany, professor Dáýlet Baıdeldınov, Abaı atyndaǵy QazUPÝ rektory Darhan Nurlanuly men óńirlerindegi stýdent jastar arasynan «Meıirimdilik akseleratory: Іzgilik elshisi» eriktileri, zańgerler men sarapshylar qatysty.
