Almatyda zań bilimin jetildirýdiń ózekti máseleleri talqylandy
ALMATY. Qarashanyń 23-i. QazAqparat /Erlik Erjanuly/ - «Quqyq ınstıtýty» degendi oqý orny dep túsinetin tálimgerler kóp. Bul Almatydaǵy Qazaqtyń ál-Farabı atyndaǵy ulttyq ýnıversıtetinde ótken «Zań bilimin jetildirýdiń ózekti máseleleri: dástúrleri men jańalyǵy» dep atalatyn ǵylymı-ádistemelik semınarda aıtyldy,
dep habarlaıdy QazAqparat.
«Zań ǵylymy júıesinde tarıhı teorııalyq quqyqtyq pánderdi oqytýda kemshin tustar bar. Birinshi, Konstıtýtsııanyń 1-shi babynyń 2-shi tarmaǵynda kórsetilgen qaǵıdalar (qazaqstandyq patrıotızm), 2010-2020 jyldarǵa arnalǵan «Quqyqtyq saıasat tujyrymdamasyndaǵy basymdyqtar oqytý kezinde, ásirese oqýlyq jazý kezinde eskerilýi kerek. Ekinshi, ǵylymnyń qaısy salasy bolmasyn termınderimen aıshyqty. Oı zerdeleýde olar qadaý-qazyq ispetti. Sondyqtan zańnama salasyn áli de tól ataýlarmen baıyta tússek», deıdi QR ІІM Akademııasynyń memlekettik -quqyqtyq pánder kafedrasynyń oqytýshysy Sábıt Jeńisuly. Zań magıstriniń aıtýynsha, zańtanýdyń negizgi termıni «quqyq». Keńestik kezeńde oryssha nusqasyn aýdarmaı «pravo» dep keldik. Derbes el bolǵanda qandas túrik baýyrlardyń termındik tájirıbesine úńilip, «quqyq» sózin ala saldyq. Ádette «quqyq» sózi jalpylama jáne derbes maǵynada qoldanylady. Jalpy maǵynasynda belgili bir zańı bilim júıesiniń jıyntyǵy retinde, al derbes maǵynada adamnyń jeke basynyń múmkinshilikterin bildiredi. «Bulardy zań ǵylymynda taptaýyn tanymmen «obektıvtik quqyq» jáne «sýbektıvtik quqyq» dep júrmiz. Sondyqtan obektıvtik quqyqty «josyq», sýbektıvtik quqyqty «quqy» al «kodeks» degendi «órnek» dep bekitsek. Qazaqtyń kóne sóz qoldanysynda «órnek» sózi ereje, nusqa degendi de bildirgen. Anglııa, Germanııa sııaqty elderde olar osy ekeýi eki basqa sózben anyqtalǵan», deıdi polıtsııa aǵa leıtenanty Sábıt Jeńisuly.
