Almatyda Zámzágúl Sháripovanyń mereıtoılyq keshi ótedi
ALMATY. 27 qazan. QazAqparat /Erlik Erjanuly/ - Almatydaǵy Qazaqtyń memlekettik Muhtar Áýezov atyndaǵy akademııalyq drama teatrynda Qazaqstannyń halyq ártisi Zámzágúl Sháripovanyń 80 jasqa tolýyna arnalǵan mereıtoılyq keshi bolady.
Ulttyq ónerge sińirgen erekshe eńbegi úshin ol 1958 jyly Qazaq KSR eńbek sińirgen artısi, 1966 jyly Qazaq KSR halyq artısi atanyp, 1958 jyly «Qurmet belgisi», 1981 jyly «Halyqtar dostyǵy», 2005 jyly «Otan» ordenderimen marapattalǵan bolatyn. 1953 jyldan beri M. Áýezov atyndaǵy drama teatrynda úzilissiz qyzmet jasap kele jatqan Zámzágúl Núsipbaıqyzy 100-den asa beıneni sahnaǵa alyp shyqty.
Olardyń ishinde M.Áýezovtiń "Aıman-Sholpanynda" Aıman, «Qaragózinde» Qaragóz, Ǵ.Músirepovtiń "Aqyn tragedııasynda" Aqtoqty, Q.Muhamedjanovtyń "Jat elde" dramasynda Eva Braýn, Á.Tájibaevtyń «Kóńildesterinde» Dámesh, Q.Baıseıitov pen Q.Shańǵytbaevtyń «Beý qyzdar-aı!», «Oı, jigitter-aı!» komedııalarynda Nursulý, S.Júnisovtiń "Ajar men Ajalynda" Ajar, D.Isabekovtiń "Ápkesinde" Qamajaı, A.Bekbosynnyń «Sońǵy seziminde» Ana, F.Býlıakovtyń «Otyz ulyń bolǵansha...» komedııasynda Sálıma, Shekspırdiń «Otellosynda» Dezdemona, «Rıchard Sh»-de Patshaıym, Gorkııdiń «Kúnnen týǵandarynda» Elena, V.Delmardyń «Ókinishti ómirinde» Anıta, L.Zorınniń «Varshava áýenderinde» Gelena, M.Meterlınktiń «Soqyrlarynda» Soqyr áıel rólderi bar. San qyrly óner ıesi kıno ónerinde Sh.Aımanovtyń "Dala qyzynda" Nurjamal, "Biz osynda turamyzynda" Dına, Q.Ábýseıitovtiń "Ómir jolynda" Hadısha, B.Sháriptiń «Zamanaı men Amanaıynda» Anany somdady.
Sondaı-aq kórkemsóz oqýdyń has sheberi radıo men televıdenıedegi kóptegen shyǵarmalardy oryndady. Mysaly S.Seıfýllınniń "Aqqý áni", M.Áýezovtiń "Abaı joly" romany men balalarǵa arnaǵan ertegileri qazirgi tańda Qazaq radıosynyń altyn qoryndaǵy qundy baılyqqa aınaldy.
