Almatyda zamanaýı jabdyqtalǵan sport alańqaıy ashyldy
ALMATY. 12 qarasha. QazAqparat /Erbol Turymbetov/ - Búgin Almaty qalasy Túrksib aýdanyna qarasty «Juldyz-1» yqshamaýdanynda zamanaýı jabdyqtalǵan sport alańqaıynyń ashylý saltanaty ótti.
Sport alańqaıy aýdandaǵy salaýatty ómir salty men VII Qysqy Azııa oıyndaryn nasıhattaý maqsatynda ashylyp otyr. Saltanatty jıynǵa qatysqan aýdan ákimi Vladımır Ýstıýgov aýdandaǵy salaýatty ómir saltyn nasıhattaý turaqty ári qarqyndy júrgizilip kele jatqanyn atap ótti.
Yqshamaýdan ortalyǵynda ornalasqan zamanaýı tehnologııalardyń eń ozyq úlgilerin qoldanǵan sport aýlasy osynda turyp jatqan halyqtyń endi sportpen kúndelikti aınalysýyna múmkindik beredi. Jergilikti turǵyndardyń aıtýynsha, ondaǵy júgirý jolaqtary men basketbol, volleıbol oıyndaryna arnalǵan alańqaılar sporttyq jaǵynan da, keshke bir mezgil seıildep, demalýǵa da óte qolaıly. Al fýtbol oıynyna arnalǵan sońǵy úlgidegi tósenishti jasandy jasyl alań mundaǵy jastardyń bos ýaqytyn tıimdi ótkizetin orynǵa aınalmaq.
