Almatyda zamanaýı stadıondar salynady
ALMATY. QazAqparat - Almatyda Almaly men Bostandyq aýdanyna qarasty №95 jáne №40 mektepterdiń janynan stadıon ashylady. Bul týraly QazAqparat tilshisi qalalyq kásipkerler palatasynyń baspasóz qyzmetine silteme jasap habarlaıdy.
Jańa oqý jyly qarsańyndaǵy joba memlekettik-jekeshelik áriptestik aıasynda júzege asyp otyr. Sport alańynyń qurylysyna jas kásipker Aqylbek Aqqaıyr 200 mln teńge kóleminde ınfestıtsııa bólgen.
«Stadıon qurylysyna zamanaýı tehnologııalar paıdalanylady. Ǵımarattyń seısmoturaqtylyǵy, balalar úshin qaýipsizdigi basty nazarǵa alynady. Alańǵa eń jaqsy degen jabyndy satyp alyp, tóseımiz. Bala qulaǵanda jaraqat almaıtyn bolady», - dedi kásipker Aqylbek Aqqaıyr.
Investordyń aıtýynsha, ár stadıonda úsh fýtbol alańy bolady. Sonymen qatar tennıs , basketbol alańdary, krossfıt, júgiretin jol jasalady.
200 oryndyq sport keshenderi bıyl qyrkúıek aıynda paıdalanýǵa beriledi.
