Almatyda zamanaýı feldsherlik-ambýlatorııalyq pýnkt ashyldy
ALMATY. QazAqparat - Búgin Naýryzbaı aýdanynyń Qaraǵaıly eldi mekeninde zamanaýı feldsherlik-ambýlatorııalyq pýnkt ashyldy, dep habarlaıdy Almaty ákimdiginiń baspasóz qyzmeti.
Pýnkt «Aq Bastaý» medıtsınalyq sport kesheniniń bazasynda quryldy, jalpy kólemi 150 kv. m. Endi bilikti dárigerlik kómek yqsham aýdandaǵy tirkelgen 10560 adamǵa kórsetiledi, olardyń 3021-i dıspanserlik esepte turǵandar.
Jańa medıtsınalyq mekemede jalpy praktıka dárigeriniń, dári-dármekterdi egýdiń, syrqatty qaraýdyń jáne aýrýdyń aldyn alýdyń kabınetteri jumys jasaıdy. Medıtsınalyq kómekti 6 dáriger, 15 ortasha medıtsına qyzmetkeri kórsetedi.
Budan ózge, pýnkt aýmaǵynda qundy tuz shahtasy bar. Mundaı medpýnktterdi Naýryzbaı aýdanynyń ózge eldi mekenderinde ashý josparlanǵan.
Eske salsaq, Almaty ákimi Baqytjan Saǵyntaevpen kezdesken kezde turǵyndar qoljetimdi medmekemelerdiń joqtyǵyn aıtyp, shaǵymdanǵan edi.
