Almatyda zaǵıp jáne nashar kóretin azamattarǵa arnalǵan «Án padıshasy - Shámshi» atty ádebı-sazdy kesh ótti
ALMATY. QazAqparat- Almatyda zaǵıp jáne nashar kóretin azamattarǵa arnalǵan «Án padıshasy - Shámshi» atty ádebı-sazdy kesh ótti. «Zaǵıp jáne nashar kóretin azamattarǵa arnalǵan Respýblıkalyq kitaphana» memlekettik mekemesinde ótken mádenı sharaǵa 50-den astam adam qatysty.
«Bul keshtiń maqsaty - osy kitaphananyń oqyrmandaryn, ıaǵnı zaǵıp jáne nashar kóretin qamkóńil jandardy Qazaqstannyń halyq ártisi Shámshi Qaldaıaqovtyń ómiri jáne shyǵarmashylyǵymen etene tanystyrý jáne kóńilderin kóterý. Sondyqtan kesh barysynda kitaphana qyzmetkerleri men oqyrmandar qosylyp Shámshi ánderin shyrqaıdy», - dedi óz sózinde atalǵan mekemesiniń Óner jáne sport ádebıetteri bóliminiń jetekshisi Múbárák Shákir.
Al kesh barysynda kitaphana qyzmetkerleri Sh. Qaldaıaqov jaıynda qyzyqty derekter keltirip, arnaıy baıandamalar oqydy. Onyń aıaǵy kishigirim kontsertke ulasty. Qulaqtary nashar estip, kózderi nashar kórse de óner jolyna qanat qaqqan jandar kompozıtordyń «Arys jaǵasynda», «Armandastar», «Qarakóz», «Aq mańdaılym» sekildi ánderin oryndady. Al kesh sońynda Múbárák Shákirdiń fortepıanoda súıemeldeýimen búgingi ádebı keshke jınalǵan 50-den astam adam «Meniń Qazaqstanym» ánin shyrqady.
Sonymen qatar, kitaphanada Sh. Qaldaıaqovtyń ómiri men shyǵarmashylyǵyna arnalǵan kitaptar, albomdar, mýzykasy jazylǵan kúıtabaqtar, SD dıskiler qoıylǵan arnaýly kórme uıymdastyryldy.
Aıta ketelik, óziniń 40 jyldan asatyn shyǵarmashylyq jolynda Shámshi Qaldaıaqov 300-ge jýyq án jazǵan eken.
