Almatyda zaǵıp jandardyń velomaýsymy bastaldy
ALMATY. QazAqparat - Almatyda Tuńǵysh Prezıdent parkinde zaǵıp velosıpedshilerdiń jańa velomaýsymy ashyldy, dep habarlaıdy QazAqparat tilshisi.
Búgin Almatyda «Shekarasyz sport» jobasy aıasynda múmkindigi shekteýli jandarǵa arnalǵan jańa velomaýsym ashylyp, ashyq jattyǵý ótti.
2016 jyly bastalǵan joba bıik belesterdi baǵyndyrýdy josparlap otyrǵanyn jarııalady. «Shekarasyz sport» jobasynyń jetekshisi Bahtııar Bazarbekov bıyl joba qatysýshylary Eýropaǵa sapar shegetinin jetkizdi.
«Jańa velomaýsymnyń jattyǵýlary endi ár senbi saıyn ótedi. Qatysýshylarymyz senbi kúnderi Qapshaǵaı qalasyna deıin velosıpedpen barady. Biz endi trıatlonnan ótetin «IRONMAN 70.3 Astana» halyqaralyq saıysyna daıyndalamyz. Atalǵan saıys TMD aýmaǵynda tuńǵysh ret ótkeli otyr. Ol 2018 jyldyń maýsym aıynda Astana qalasynda bolady. Sonymen qatar, bıyl Astana - Parıj mejesin baǵyndyrmaqpyz. Jalpy joba kóz janary nashar kóretin jandardy shabyttandyrýǵa arnalǵan. Biz múmkindigi shekteýli jandardyń belsendi, densaýlyǵy myqty bolǵanyn qalaımyz», - dedi Bahtııar Bazarbekov.
Búgingi jattyǵýǵa jobanyń 30 qatysýshysy keldi. Endi olar kelesi senbi Qapshaǵaı qalasyna deıingi qashyqtyqty baǵyndyryp, alys jolǵa arnalǵan jattyǵýlaryn bastaıdy. Bahtııar Bazarbekov jobaǵa jańadan qosylýǵa tilek bildirýshiler bar ekenin aıtty. Mysaly, búgingi jańa maýsymnyń ashylýyna 2 qatysýshy kelip, tirkeldi.
Eske sala keteıik, zaǵıp jandar 2016 jyly erikti velosıpedshilermen birge alǵash ret alys qashyqtyqty baǵyndyrǵan. Onda joba qatysýshylary Almatydan Astanaǵa barǵan bolatyn.
