Almatyda zaǵıp jandar úshin oqýlyq shyǵaratyn baspahana ashylady
«Elimizdiń eń mańyzdy rezervi – adamı rezerv. Muny Táýelsizdiktiń eń birinshi kúninen beri Elbasymyz jáne qazirgi Prezıdentimiz de aıtyp júr. Sondyqtan sizderge eńbek joldaryńyzda da, ómirlik joldaryńyzda da jaqsylyq tilep, kásibı qabiletterińizdi elimizdiń kórkeıýinde kórsetýge nıet qylamyn. Mádenıet, sport, týrızm salasy – qoǵamnyń eń erekshe salalary dep oılaımyn. Mádenıettiń deńgeıi – jalpy el men qoǵamnyń deńgeıin kórsetedi. Elimizde eń birinshi kúnnen bastap «Mádenı mura», «Rýhanı jańǵyrý», «Uly dalanyń jeti qyry» atty úlken baǵdarlamalyq maqalalar shyǵyp, mádenıetimizdiń ártúrli salalarda damýyna úlken jumys júrgizip jatyrmyz», - dedi A. Raıymqulova elordada ótken Prezıdenttik jastar kadrlyq rezervteriniń forýmynda.
Sonymen qatar, mınıstr zaǵıp jandarǵa arnalǵan jańa baspahananyń jumysy týraly aıtty.
«Erekshe kútimdi talap etetin jandarǵa jaǵdaı jasaý qashanda mańyzdy baǵyttardyń biri. Mádenı-aǵartý salasyna kelsek, búginde elimizde kórý qabileti buzylǵan jandarǵa arnalǵan 17 kitaphana bar. Ókinishqe qaraı, egemendik alǵaly 30 jyldyń ishinde zaǵıp jandarǵa arnalǵan birde bir qazaqsha ne oryssha oqýlyq jaryq kórmepti. Reseıde bar, onyń quny 30 myń teńge turady. Osy oraıda Úkimet Almatyda Braılıa qarpi boıynsha zaǵıp jandarǵa arnalǵan kitap shyǵaratyn baspahana ashý týraly sheshim qabyldady. «El rýhy» ulttyq jobasy aıasynda aýqymdy sharalar qolǵa alynyp jatyr. Qazirgi ýaqytta Qasteev atyndaǵy kórkemóner galereıasynda ǵana kórý qabileti nashar azamattar úshin jaǵdaı jasalǵan. Osy olqylyqtyń ornyn toltyrý maqsatynda aldaǵy 5 jylda 52 mádenı-aǵartý uıymyn estý jáne kórý qabileti nashar jandarǵa arnalǵan qural-jabdyqpen qamtamasyz etýdi josparlap otyrmyz», - dedi ol.
Aıta ketsek, buǵan deıin otandyq avtor, Prezıdenttik jastar kadrlyq rezerviniń múshesiniń zaǵıp jandarǵa arnalǵan apparatty oılap tapqany týraly habarlaǵan bolatynbyz.
