Almatyda XIX Sýrdlımpıada oıyndary ótýi múmkin
ALMATY. QazAqparat - Almaty ákimi Baýyrjan Baıbek qulaǵy múkis adamdardyń Halyqaralyq sport komıtetiniń prezıdenti Valerıı Rýhledevpen kezdesti, dep habarlaıdy QazAqparat tilshisi.
Qos tarap Almatyda 2019 jyly qysqy XIX Sýrdlımpıada oıyndaryn ótkizý múmkindikterin talqylady.
Valerıı Rýhledev qalada qysqy sport túrleri, sonyń ishinde Sýrdlımpıada oıyndaryn ótkizý boıynsha qajetti ınfraqurylymdardyń bar ekenin jáne sol arqyly múmkindigi shekteýli jandardy buqaralyq sportqa keńinen tartýǵa bolatyndyǵyn aıtty.
«Biz Almaty qalasynda salynǵan tamasha sport ınfraqurylymymen tanystyq. Nysandardyń sáýleti jáne zamanaýı standartqa saı jabdyqtalǵany, belsendi sporttyq ómir de tánti etti. Biz kerlıng pen taý shańǵysy boıynsha ótken respýblıkalyq jarystardy, balalardyń mánerlep syrǵanaý men hokkeı oınaý barysyndaǵy jattyǵýlaryn, sonymen qatar konkı men shańǵydan jappaı syrǵanaý sııaqty sharalardy kórdik. Osynyń barlyǵy, joǵary deńgeıde ótken 28-shi Búkilálemdik qysqy Ýnıversıada búgingi kúni Almatynyń álemdik qysqy sport ortalyǵy ekenin dáleldeıdi», - dedi sheteldik sarapshy.
Onyń aıtýynsha, Sýrdlımpıadalyq oıyndar qalalardyń qoǵamdyq keńistigin jaqsartady. Múmkindigi shekteýli jandar úshi arnaıy pandýstar, lıftiler, trotýarlar, baǵdarshamdar paıda bolyp, arnaıy belgiler, vızýaldy kórsetkishter jáne kóptegen basqalary ornatylady.
«Qulaǵynyń múkisi bar adamdardyń Halyqaralyq sport komıtetiniń qurylǵan 94 jyl ishinde qysqy Sýrdlımpıada oıyndary Azııa qurlyǵynda birde-bir ret ótpepti. Kóp jyldyq tájirıbeden baıqaǵanymyz, Sýrdlımpıada oıyndary ótken soń múmkindigi shekteýli jandardyń boıynda dene shynyqtyrý men sportqa degen belsendilik arta túsedi. Oıyndar olardyń erik-jigerin, áleýmettik ómirge degen qyzyǵýshylyǵyn arttyrady. Almatydan ótinim túsken joq, biraq biz qalany osy oıyndardyń bolyp qalýy múmkin astanasy sanaımyz», - dep tolyqtyrdy ol óziniń sózin.
Aıta keterligi, qazirgi kezde qalada 44,1 myń múgedek turady. Olardyń 5-myńǵa jýyǵy qulaǵy nashar estıtinder. 2017 jyly múgedekterge áleýmettik kómek retinde 4,1 mlrd teńge bólindi
Sýrdlımpıada oıyndary - qulaǵy estimeıtin adamdardyń sporttyq jarysy, alǵashqy jarys 1924 jyly Parıjde ótken bolatyn.
