Almatyda «Winter Family Party» festıvali ótedi
ALMATY. QazAqparat - Almatyda «Winter Family Party» otbasylyq qysqy festıvali ótedi, dep habarlaıdy QazAqparat tilshisi.
Festıval 22-23 jeltoqsanda «ATAKENT» Qazaqstandyq iskerlik yntymaqtastyq ortalyǵynyń aldyndaǵy Almaty tıini art-nysanasy ornalasqan alańda ótkiziledi.
«Biz Almaty qalasynyń barlyq turǵyndary men qonaqtaryn «WINTER FAMILY PARTY» qysqy festıvaline shaqyrýǵa qýanyshtymyz! «Atakent» mańyndaǵy tıin turǵyndardyń eń súıikti demalys ornyna, almatylyqtar úshin tartylys ornyna aınaldy. Ashyq otbasylyq qysqy festıval - qalalyq ınfraqurylymdy damytý, qalada ómir súrý sapasyn jaqsartý jáne elimizdiń týrıstik áleýetin arttyrý jolyndaǵy qısyndy qadam bolyp tabylady», - dedi uıymdastyrýshylar ókili, Almaty qalasy ákimdiginiń Mádenıet basqarmasynyń basshysy Hanzada Esenova.
Sonymen qatar, jeltoqsan aıynyń basynda tıinniń mańynda tegin qalalyq muz aıdyny ashyldy. Ol qys boıy jumys isteıtin bolady. Janynda qysqy syrǵanaq tóbe, labırınt salynady, fýd- aımaq jáne qazaqstandyq qolónershilermen jasalǵan kádesyılary bar dúkender ornatylady.
Uıymdastyrýshylardyń aıtýynsha, festıval baǵdarlamasy otbasylyq aýdıtorııaǵa da, barlyq azamattarǵa da arnalǵan kóptegen is-sharalardy qamtıdy. Barlyq kelýshilerge festıvalge kirý tegin bolady.
Muz aıdynynda mánerlep syrǵanaýshylardyń kórneki óner kórsetýleri bolady, festıvaldiń sahnasynda balamaly mýzykanynyń qazaqstandyq oryndaýshylary óner kórsetedi. Bı áýesqoılary úshin zýmba-marafon, al teatr súıer qaýymǵa - qalalyq táýelsiz teatrlardyń qoıylymdary men kórsetilimderi uıymdastyrylady. Sonymen qatar, festıval baǵdarlamasy túrli sheberlik-synyptary men júldeli baıqaýlarǵa toly bolmaq.
H.Esenovanyń aıtýynsha, osyndaı merekelik qalalyq tartylys oryndary Panfılov kóshesinde jáne Abaı alańynda uıymdastyrylatyn bolady. Qalanyń basty Shyrshasy Abaı alańyna ornatylatyn bolady. Bıylǵy jyly sándik-qalalyq jańa jyldyq bezendirý skıf-saq janýarlyq stılinde bolady.
