Almatyda WBS aıasynda "Astana Arlans" pen "D&G Milano Thunder» komandalarynyń jekpe-jegi ótedi
ALMATY. 28 qańtar. QazAqparat /Erlik Erjanuly/ - Almatyda 3 aqpan kúni Balýan Sholaq atyndaǵy sport saraıynda Búkiálemdik boks serııasy aıasynda "Astana Arlans" pen "D&G Milano Thunder» komandalarynyń jekpe-jegi bolady.
Bul astanalyq bylǵary qolǵap sheberleriniń bıylǵy maýsymdaǵy Almatyda ótkizip otyrǵan alǵashqy matchy bolmaq.
Qazirgi tańda týrnır kestesinde 7 kezdesýdiń bireýinde ǵana jeńilis tapqan ıtalıandyq klýb 18 upaımen «A» tobynda kósh bastap kele jatyr. Alǵashqy 2 kezdesýde jeńilis tapqan qazaqstandyqtar 16 upaıymen ekinshi satyda tur. Olar syrt alańda 13-qarashada amerıkandyqtarǵa («Los Angeles Matadors») 2:3, ıtalıandyqtarǵa 0:5 esebimen utylǵan edi. Óz alańynda 14 qańtarda amerıkandyqtardan ese qaıtardy. Onda 54 kelide Danııar Toqbaev Djoet Gonsalesti (48:47, 47:48, 49:46), 61 kelidegi Mereı Aqshalov Leonıd Malkovty ( 49:46, 47:48, 49:46) upaı sanymen utty. Al 73 kelidegi Qanat Іslám -Zaal Kvachatadzeni nokaýtpen jeńdi. Odan keıin astanalyqtardyń 85 kelidegi ózbekstandyq legıoneri Ramjon Ahmedov qonaqtardyń legıneri Sergeı Korneevke (47:48, 46:49, 46:49) ese jiberdi. Al aýyr salmaqtaǵy Rýslan Myrsataev Mohammed Ardjaýı arasyndaǵy sońǵy jekpe-jek 48:46, 47:47, 48:46 esebimen aıaqtaldy. Qorytyndy esep 4:1. Astanalyqtar endi ıtalıandyqtardan da ese qaıtaratyn bolsa, óz tobynda kósh bastaýǵa múmkindigi bar.
