Almatyda volonterlerdiń 70 paıyzy erikti túrde ekpe saldyrdy
ALMATY. QazAqparat - Almaty qalasynyń jappaı vaktsınalaý shtaby eriktileriniń úılestirýshisi Jánibek Soltanaı onlaın brıfıng barysynda qala turǵyndary ekpe alý pýnktterine belsendi túrde kelip jatqanyn aıtty, dep habarlaıdy QazAqparat tilshisi.
«Qala turyǵyndary arasynda jappaı vaktsına salýdy júrgizýdiń aldynda ákimdik, memleket tarapynan keshendi jumys júrgizildi. Solardyń qatarynda bizdiń medıtsınalyq joǵary oqý oryndary men kolledj stýdentteri bar. Olar ózderi sabaq ótip júrgen klınıkalyq bazadaǵy naýqastarmen sóılesý arqyly, ózderi júrgen ortada osy vaktsınanyń mańyzyn túsindirý jumysyna belsendi aralasty. Sonyń nátıjesinde qazir qala turǵyndary vaktsına salý oryndaryna kóptep kelýde»,-deıdi ol.
Sonymen qatar ol ekpe salý oryndarynda jumys istep jatqan volonter qatarynda medıtsınalyq oqý orn y nyń stýdentterimen birge ózge mamandyq ıeleri de bar ekenin aıtty.
«Ekpe salý pýnkteriniń jumysyn úılestirý úshin medıtsınalyq bilim mindetti emes. Óıtkeni bir jyldan beri koronavırýs ınfektsııasymen birge ómir súrip kelemiz. Barlyǵy maska taǵyp, áleýmettik qashyqtyqty saqtaý qajettigin jaqsy biledi. Sondyqtan medıtsınalyq emes oqý orynnyń stýdentteri osyndaı qaýipsizdik sharasyn ustanýǵa kómektesip jatyr», - deıdi Jánibek Soltanaı.
Onyń aıtýynsha, volonterlerdiń 70 paıyzy erikti túrde ekpeni saldyrǵan, qalǵandary aldaǵy ýaqytta saldyrady. Degenmen ekpeni saldyrý árkimniń óz erkinde.
