Almatyda voleıboldan qyzdar arasyndaǵy jarys márege jetti
ALMATY. QazAqprat - Qazaq memlekettik qyzdar pedagogıkalyq ýnıversıtetinde voleıboldan qyzdar arasynda ótken QR joǵary oqý oryndary stýdentterinyń IX Jazǵy Ýnıversıadasy aıaqtaldy.
Bul týraly oqý ornynyń Medıa ortalyǵy habarlady.
Qyzdar ýnıversıtetiniń muryndyq bolýymen alǵash ret uıymdastyrylǵan saıystyń maqsaty - jastardyń densaýlyǵyn nyǵaıtyp, sporttyq sheberligin shyńdaý jáne olardyń arasynda salaýatty ómir saltyn qalyptastyrý.
Qazan aıynyń 11-16 kúnderi aralyǵynda ótken jarysqa 16 komanda qatysyp, baqtary men baptaryn synady.
Sharada ýnıversıtet rektory Gaýhar Aldambergenova sóz sóılep, jarystyń mán-mańyzyna toqtalyp ótti.
- Barsha azamattardyń densaýlyǵyn nyǵaıtý - jarqyn bolashaqqa aparatyn altyn súrleý dese de bolady. Memleket basshysy Nursultan Nazarbaev Qazaqstan halqyna arnaǵan Joldaýynda dene shynyqtyrý men sportty damytýǵa aıryqsha kóńil bólý qajettigine basymdyq bergen bolatyn. Qazirgi tańda osy baǵytta aýqymdy memlekettik baǵdarlamalar qabyldanyp, júzege asyrylýda. Jalpy bilim beretin orta mektepte jan-jaqty damyǵan, densaýlyǵy myqty, salaýatty ómir saltyn murat tutqan jeke tulǵalardy tárbıeleý basty talap etilip otyr. Búgingi jas urpaqtyń bilimdi de bilikti, sapaly azamat bolyp jetilýi tálim-tárbıe beretin ustazǵa, ata-anaǵa, ósken ortasyna tikeleı baılanysty. Sondyqtan da bolashaq pedagog mamandardy daıarlaıtyn ujymnyń aldynda turǵan basty máseleniń biri - salaýatty ómir saltyn nasıhattaý, - dedi Gaýhar Tóremuratqyzy.
Tartysty ótken jarys qorytyndysy boıynsha, M. Qozybaev atyndaǵy Soltústik Qazaqstan memlekettik ýnıversıteti 1-orynǵa ıe boldy. 2-oryndy ál-Farabı atyndaǵy Qazaq Ulttyq ýnıversıteti enshilese, 3-oryn Qazaq memlekettik qyzdar pedagogıkalyq ýnıversıtetiniń komandasyna buıyrdy.
Ýnıversıtet basshylyǵy sport básekesinde «júzden - júırik, myńnan - tulpar» shyqqan komandalar men jekeleı qatysýshylarǵa Alǵys hattar jáne baǵaly syılyqtar tabystady.
Shara sońy Qyzdar ýnıversıtetiniń «Tomırıs» bı ansambliniń kontsertine ulasty.
