Almatyda voleıboldan QR Prezıdenti N.Nazarbaevtyń kýbogy úshin halyqaralyq týrnıri ótedi
ALMATY. 18 tamyz. QazAqparat /Erlik Erjanuly/ - Almatydaǵy Balýan Sholaq atyndaǵy sport jáne mádenıet saraıynda 22-27 tamyz aralyǵynda voleıboldan erler komandalary arasynda «QR Prezıdenti Nursultan Nazarbaevtyń kýbogy» 18-shi halyqaralyq týrnıri ótedi.
Ony «Samuryq-Qazyna» ulttyq ál-aýqat qorynyń qoldaýymen QR Týrızm jáne sport mınıstrligi, QR Voleıbol federatsııasy jáne Almaty qalasynyń ákimdigi birlesip uıymdastyryp otyr. Dástúrli túrde jyl saıyn ótetin bul sport dodasyna bıyl Qazaqstan, Belarýs, Iran, Qytaı, Úndistan, Týnıs elderiniń ulttyq quramalary men Reseıdiń Novyı Ýrengoı óńirinen «Fakel» voleıbol klýby qatyspaq. Al bıyl Qazaqstannyń qos quramasy da jerebe boıynsha irikteý kezeńinde «A» tobynda Qytaı men Týnıs voleıbolshylarymen synǵa túsetin boldy. Iran, Belarýs Reseı jáne Úndistan sportshylary «V» tobynda óner kórsetpekshi. Jarys Úndistan quramasy men Reseıdiń «Fakel» voleıbol klýby arasyndaǵy oıynmen bastalady. Básekeniń resmı ashylý rásiminen keıin «Qazaqstan-1» men «Qazaqstan-2» ózara saıysqa túsetin boldy. Týrnır jeńimpazdary 27-tamyzdaǵy aqtyq synda belgili bolmaq.
