Almatyda voleıboldan Qazaqstan kýbogynyń jartylaı jáne aqtyq oıyndary bolady
ALMATY. 28 qazan. QazAqparat /Erlik Erjanuly/ - Almatyda 29-30 qazan kúnderi «Temir dos» sport kesheninde voleıboldan Qazaqstan kýbogynyń jartylaı jáne aqtyq oıyndary ótedi.
KSRO sport sheberi, eńbek sińirgen jattyqtyrýshy Oktıabr Jarylǵapovty eske túsirýge arnalǵan bul dúbirli dodanyń erler komandalary arasyndaǵy shırek fınaldyq oıyndary 18-26 qazan kúnderi ótken bolatyn. Onda úzdik tórttikke engen «Almaty» (Almaty), «TNK «Qazhrom» (Hromtaý), «Dınamo-Qazyǵurt» (Shymkent) pen «Shyǵys-QorǵasynQurylys» (Óskemen) komandalary Qazaqstan kýbogyn sarapqa salady. Al áıelder arasynda mundaı mártebege 4-11 qazanda Pavlodar qalasynda ótken shırek fınalda «Jetisý» (Almaty oblysy), «Qaraǵandy» (Qaraǵandy), «Ertis-Qazhrom» (Pavlodar oblysy) men «Astana» (Astana) ıe bolǵan edi.
