Almatyda voleıboldan áıelder komandalary arasyndaǵy Qazaqstan kýbogy jarysynyń alǵashqy kezeńi aıaqtaldy
ALMATY. Qyrkúıektiń 1-i. QazAqparat /Erlik Erjanuly/ - Keshe Almatyda voleıboldan áıelder komandalary arasyndaǵy Qazaqstan kýbogynyń alǵashqy kezeńi aıaqtaldy, dep habarlaıdy QazAqparat QR Voleıbol federatsııasyna silteme jasap.
Úsh kúnge sozylǵan alǵashqy kezeńniń qorytyndysynda shırek fınalǵa joldama alǵan 4 komandanyń aty belgili boldy. Bul saıysta "Qaraǵandy" birinshi, "Metallýrg" (Temirtaý) ekinshi, "Shyǵys-SvınetsStroı" (Óskemen) úshinshi, "TsSKA-Almaty" (Almaty) tórtinshi oryn aldy. Endi qazannyń 1-9 kúnderi Taldyqorǵanda ótetin Qazaqstan kýbogynyń shırek fınaldyq oıyndarynda baq synaıdy. Onda olardyń qataryna Ulttyq lıgadan Almaty oblysynyń "Jetisý", Pavlodar oblysynyń "Ertis-Qazhrom" jáne Almaty men Astananyń qalalarynyń attas komandalary qosylady.
