Almatyda vırýsty qoǵamdyq kólikte juqtyrý qaýpi 25%-ǵa deıin jetti
ALMATY. QazAqparat- Almaty qalasy Bostandyq aýdanynyń ákimi Altaı Rahymbetov onlaın brıfıng barysynda aýdannyń epıdemıologııalyq ahýalyna toqtaldy, dep habarlaıdy QazAqparat tilshisi.
Onyń aıtýynsha, 2020 jyly Bostandyq aýdanynda barlyǵy 3 014 adam indet juqtyrǵan bolsa, bıyl 681 adamnan koronavırýs anyqtaldy. Sońǵy 3 kúnde 73 turǵyn KVI juqtyrǵan.
«Vırýstyń qaıta órshýine baılanysty 2021 jylǵy 10 naýryz kúni Almaty qalasynyń bas sanıtarly dárigeriniń indettiń aldyn-alýǵa baǵyttalǵan sharalardy kúsheıtý týraly qaýlysy shyqty. Alaıda atalǵan qatań sharalardyń qajettigin jáne adam densaýlyǵy úshin mańyzdylyǵyn barlyq kásipkerler jiti túsinbegen sııaqty. Qabyldanǵan qaýlyǵa qaramastan kóptegen túngi klýbtar, karaoke barlar, kompıýterlik klýbtar óz jumysyn toqtatpaı, indettiń taralýyna jol ashyp otyr»,-deıdi ol.
Júrgizilgen saraptama jumystary kórsetkenindeı oıyn-saýyq ortalyqtary men saýda úılerinde aýrýdy juqtyrý deńgeıi 22% ósken, bazarlarda 13% artqan, qoǵamdyq kólikte juqtyrý qaýpi 25% deıin jetip otyr.
«Osy rette aýdanymyzdaǵy monıtorıng jumystaryn kúsheıtý maqsatynda monıtorıngtik toptardyń sany 4-ten 7-ge deıin ulǵaıtyldy. Aǵymdaǵy jyl basynan beri atalǵan monıtorıngtik toptarmen barlyǵy 1 233 nysan tekserilip, 27 zańdy tulǵaǵa qatysty 9,8 mln tengeniń jáne 144 jeke tulǵaǵa qatysty 6,3 mln tengeniń ákimshilik hattamasy toltyryldy»,-deıdi aýdan ákimi Altaı Rahymbetov.
Sonymen qatar ol karantın rejımin eń kóp buzatyn nysandardy atady. Olardyń qatarynda Karaoke «Crystal», Gastrobar «Gastreat», Restobar «VanGog», «Queer» túngi klýby, «BE TO BEE» bary, «STRONG» kompıýter klýby jáne taǵy basqalary bar.
9 nysan boıynsha tıisti materıaldar sotqa joldanǵan. Onyń 5-ýi boıynsha sottyń sheshimi shyǵarylypty. Qalǵan 4 nysan boıynsha tıisti sharalar júrgizilýde.
«Ótken demalys kúnderi, ıaǵnı 13-14 naýryz kúnderi aýdanda ornalasqan barlyq iri saýda ortalyqtary jabyldy. Qoǵamdyq kóliktiń jumysyna qatań baqylaý uıymdastyryldy. Jolaýshylardyń maska rejımin saqtaý týraly tártibi qatań baqylaýda. Іndetpen kúrestiń tıimdi joldarynyń biri vaktsınatsııa ekeni belgili. Birinshi kezekte 792 medıtsına qyzmetkerleri vaktsınatsııadan sátti ótti. Qazirgi tańda polıtsııa jáne bilim mekemeleriniń qyzmetkerleri vaktsınatsııadan ótýde»,-dedi spıker.
Sóz sońynda ol aýdan turǵyndaryn saqtyq sharalaryn saqtaýǵa shaqyrdy.
«Aldymyzda kele jatqan Naýryz meıramynda qala turǵyndary 5 kún demalatyn bolady. Bárimiz jaqsy biletindeı, osy kúnderi halyq bir-biriniń úıine qonaq bolyp,kórisip, meıramdy toılap jatady. Alaıda, qazirgi jaǵdaıdy eskere otyryp, jaýapkershilik tanytyp, jaqyn týǵan-týystarymyzdy oılasaq, merekelik sharalardan bas tartyp, kópshilik is-sharalarǵa qatyspaǵanymyz jón.Osyny eskere otyryp, aýdan turǵyndaryn saqtyq sharalardy saqtaýǵa shaqyramyn», - deıdi aýdan ákimi.
