Almatyda vırýsty qaıtadan juqtyrǵan jaǵdaı bolmady - Jandarbek Bekshın
ALMATY. QazAqparat – Almatyda koronavırýs ınfektsııasyn qaıta juqtyrý jaǵdaıy tirkelmedi.
Bul týraly onlaın brıfıng barysynda qalanyń bas sanıtarlyq dárigeri Jandarbek Bekshın aıtty, dep habarlaıdy QazAqparat tilshisi.
Almatyda osy ýaqytqa deıin vırýsty qaıta juqtyrǵan adam tirkelmedi. Tek bir jaǵdaıda vırýs adamnyń aǵzasynda uzaq júrgen.
«Naýqas adam shildede koronavırýs ınfektsııasymen aýrýhanaǵa jatqan. Analız tapsyrǵan kezde test oń nátıje kórsetken. Keıin tamyzda tapsyrǵan taldaýy da oń bolyp shyqty. Ol úıine oqshaýlanýǵa jiberildi. Qazanda tapsyrǵan PTR taldaýy taǵy da oń nátıje kórsetken. Alaıda klınıkalyq sımtomdar baıqalmady. Sondyqtan bul uzaqqa sozylǵan vırýs tasymaldaý dep baǵalandy», - dedi J.Bekshın.
Munyń aldynda bas sanıtarlyq dáriger jańa qaýly qabyldap onda kınteatrlar men saýda, oıyn-saýyq ortalyqtarynyń jumysyn reglamenttegen bolatyn.
