Almatyda VIP-saýnanyń dırektory, qyzmetkerleri men klıentteri jaýapqa tartyldy
ALMATY. QazAqparat - Almatyda VIP-saýnanyń dırektory, qyzmetkerleri men klıentteri ákimshilik jaýapkershilikke tartyldy, dep habarlaıdy QazAqparat tilshisi.
Tótenshe jaǵdaı kezinde jumys istegen saýnany Áýezov aýdanynyń Polıtsııa basqarmasynyń qyzmetkerleri áshkerelegen bolatyn.
Keshenniń ákimshilik dırektory, bas esepshi, eki massajıst, eki kelýshi, sondaı-aq er adamdarǵa ıntımdik qyzmet kórsetken eki áıel ákimshilik jaýapkershilikke tartyldy.
«Biz beınekadrdy muqııat zerttep, karantın kezinde monsha kesheni 2 ret ashyq bolǵanyn anyqtadyq. Keshenge kelgen azamattardy taptyq, tótenshe jaǵdaıdy buzǵany úshin árqaısysy QR ÁQbK-niń 476-baby boıynsha ákimshilik jaýapkershilikke tartyldy. Ótken túnde olardyń ekeýi mamandandyrylǵan aýdanaralyq ákimshilik sotynyń sheshimimen ákimshilik qamaýǵa alyndy. Qalǵan quqyq buzýshylarǵa qatysty sheshim búgin qabyldanady», – dedi Áýezov aýdandyq Polıtsııa basqarmasynyń basshysy Álisher Tursynbetov.
Onyń aıtýynsha, saýnanyń 56 jastaǵy qojaıyny qazir polıtsııadan boı tasalap júr.
«Biraq erte me, kesh pe ol anyqtalyp, jaýapqa tartylady. Biz taǵy da azamattardy zańdy qatań saqtaýǵa jáne qoǵamnyń qaýipsizdigine baǵyttalǵan karantındi buzbaýǵa shaqyramyz», – dedi Tursynbetov.
