Almatyda VІІІ halyqaralyq Nádir Nádirov ǵylymı oqýlary ótedi

dep habarlaıdy QazAqparat.

QR Bilim jáne ǵylym mınıstrligi, QR Ulttyq ınjenerlik akademııasy, Atyraý munaı jáne gaz ınstıtýtynyń qoldaýyndaǵy bul shara bıyl "KazRosGaz" JShS-niń demeýshiligimen Qazaqtyń ál-Farabı atyndaǵy ulttyq ýnıversıtetinde ótpek. Onda munaı-gaz ǵylymynyń, tehnıka jáne óndiris salasynyń mamandary, jetekshi óndiris ornynyń basshylary, joǵary oqý oryndarynyń professorlary bas qosady. Olar zamanaýı munaı-gaz kesheniniń ǵylymı-tehnologııalyq baǵytynyń damýy, otandyq jáne sheteldik ǵalymdardyń jańa ıdeıasy men baǵyt -baǵdary, tájirıbesi, múmkindikteri jóninde oı bólispek. QR Ulttyq ınjenerlik akademııasynyń birinshi vıtse-prezıdenti, "Munaı jáne gaz" jýrnalynyń Bas redaktory N.K. Nádirov bul joly da alqaly jıyndy óziniń plenarlyq baıandamasymen bastaıdy.

Halyqaralyq Nádirov ǵylymı oqýlary ǵylymı jumystar men ınjenerlik shyǵarmashylyqty jáne oqý úderisterin jetildirý maqsatyn kózdeıdi. Ózekti máselelerdi jan-jaqty qarastyryp qana qoımaı, tanymal ǵalymdardyń jurtshylyqqa belgisiz eńbekterin tanystyrýǵa da erekshe mán beretin bul shara alǵash ret 2001 jyly uıymdastyrylǵan bolatyn. Buǵan deıin Qazaqstannyń Atyraý, Shymkent, Aqtaý, Aqtóbe, Qyzylorda, Oral qalalarynda ótken konferentsııa mańyzdy qoǵamdyq qubylys retinde 2006 jyly Reseı Ǵylym akademııasynyń Sibir bólimindegi (Tomsk qalasy) Munaı-gaz ınstıtýtynda ótkizildi.

1932 jyly qańtardyń 6-synda Ázirbaıjannyń Nahchyvan aýdanyndaǵy Kıkach aýylynda ómirge kelgen N.Kárimuly 5 jasynda otbasy stalındik qýǵyn-súrginmen Qazaqstanǵa qonys aýdarǵan bolatyn. Búginde 88 jasqa kelip otyrǵan Nádir Kárimuly Nádirov álemdik deńgeıdegi munaı hımııasy jáne munaı óndirý jumystarynyń qazaqstandyq ǵylymı mektebin qalyptastyrýshylardyń biri sanalady. Ol 800-den asa jarııalanymnyń, 27 monografııanyń, 300 -deı ǵylymı eńbektiń jáne 5 ǵylymı jańalyqtyń avtory. Munaı-gaz ǵylymy men óndirisindegi zor úlesi úshin QR UǴA akademıgi ár jyldary - Ǵylymǵa eńbek sińirgen qaıratker, Qazaq KSR Memlekettik syılyǵynyń laýreaty, KSRO Qurmetti munaıshysy, KSRO ǵylymtanýshysy, I.M.Gýbkın atyndaǵy syılyqtyń ıegeri, Qazaqstan Respýblıkasynyń Qurmetti ınjeneri, Reseı Federatsııasynyń úzdik halyq aǵartýshysy, Ǵylym marshaly (Frantsııa) degen sııaqty kóptegen ataqtarmen marapattaldy.