Almatyda VII qysqy Azıadanyń Alaý otynyń basty tasymaldanbaly ottyǵyn Qazaqstan Halyq Bankine saqtaýǵa tapsyrý rásimi boldy
ALMATY. 12 qańtar. QazAqparat /Názıra Eleýhan/- Búgin Almatyda VII qysqy Azıadanyń Alaý otynyń basty tasymaldanbaly ottyǵyn «Qazaqstan Halyq Banki» AQ Bas keńsesinde saqtaýǵa tapsyrý rásimi saltanatty túrde bolyp ótti.
Azıadanyń Alaý oty ornalastyrylǵan basty tasymaldanbaly ottyǵyn Azııa oıyndary dırektsııasy ókiliniń qolynan Bank Basqarmasynyń tóraǵasy Úmit Shaıahmetova qabyldap alyp, arnaýly tuǵyrǵa ornatty. Tosyn jaǵdaılar oryn alýy múmkin bolsa, uıymdastyrýshylar dál osy tasymaldanbaly ottyqty paıdalaný arqyly Azıada alaýynyń otyn qaıta tutata alady. Tasymaldanbaly ottyqty kúzetý Halyq Bankiniń jáne Alaý estafetasy dırektsııasynyń qaýipsizdik qyzmetiniń kúshimen jáne tehnıkalyq quraldarymen júzege asyrylatyn bolady.
2011 jyldyń 12 qańtarynan bastap qysqy oıyndar aıaqtalatyn 6 aqpanǵa deıingi merzimde Alaý oty Halyq Bankiniń Almatydaǵy Bas keńsesinen arnaıy bólingen zalynda saqtalady. Al Alaý otynyń taǵy bir negizgi kóshirmesi charterlik reıspen Qazaqstannyń oblys ortalyqtaryn aralaıdy.
Bank Basqarmasynyń tóraǵasy Úmit Shaıahmetovanyń aıtýynsha, Alaý otynyń estafetalyq baǵdary júrip ótetin qalalarda negizgi kolba Halyq Bankiniń oblystyq jáne óńirlik fılıaldarynda saqtalatyn bolady jáne alaýdy alyp júrýshilerdiń qolyna berilip otyrady.
Saltanatty rásimde sóz sóılegen Qazaqstan Halyq Banki Dırektorlar keńesiniń tóraǵasy Aleksandr Pavlov: «Biz búgin bárimiz erekshe tarıhı oqıǵanyń kýási bolyp otyrmyz. Bul oqıǵa banktiń jáne qalamyzdyń tarıhyna kireri sózsiz. Óıtkeni, bank tuńǵysh ret Azıda rámizin saqtaýshy bolyp otyr. Azıadanyń Alaý otyn saqtaýshy atanýǵa úmitkerler arasynan neǵurlym senimdi bank retinde Halyq Bankiniń tańdalýy kezdeısoq emes: turǵyndardyń da, memlekettik mekemeler men iskerler tobynyń da Bankke degen senimdilik deńgeıi joǵary, sonymen qatar, elimiz boıynsha Banktiń fılıaldar jelisi barynsha keń taralǵan. Biz Azıada uıymdastyrýshylaryna 87 jyldyq tarıhy bar, búginde senimdi jáne turaqty bankterdiń birine aınalǵan Halyq Bankine Azıada alaýy otyn saqtaýǵa senip tapsyrǵandaryna alǵysymyzdy bildiremiz. Myńdaǵan alaý otyn alyp júrýshiler qatarynda bizdiń eń úzdik qyzmetkerler men bank klıentteri bolatynyn maqtan tutamyz. Halyqqa beıbitshilik, dostyq, yntymaqtastyq ákeletin Azıada alaýyna, qosh keldiń deımiz!», -dedi.
Bank basshylarynyń aıtýynsha, Alaý oty ornatylǵan tasymaldanbaly ottyq tuǵyryn jurtshylyq Azıada ótetin merzim ishinde kún saıyn saǵat 9-dan 20-ǵa deıin tamashalaı alady jáne tilek bildirýshiler Alaý otynyń janynda estelik sýretke túse alady.
Internet jelisin paıdalanýshylar Azıada Alaý otynyń basty tasymaldanbaly ottyǵyn Halyq Bankiniń korporatıvtik saıtyndaǵy arnaýly bólimnen kóre alady: www.halykbank.kz.
Alaý otyn Almaty qalasynda saltanatty túrde qarsy alý rásimi ótkizilgennen keıin estafeta ońtústik astana kóshelerimen júrip ótip, odan ári Qazaqstannyń oblys ortalyqtaryna bet alady, al qańtardyń 30-y kúni Astana qalasynda óz máresine jetedi, sóıtip osyndaı keń aýqymdy sharaǵa respýblıka halqy túgeldeı derlik kýá bolmaq.
Elimizdiń barlyq óńirin qamtıtyn Alaý estafetasyna qatysýǵa laıyqty dep tanylǵandar qatysady, olardyń qatarynda Halyq Bankiniń atynan shaǵyn jáne orta bıznes klıentteri arasynan jáne Bank qamqorlyǵyndaǵy balalar mekemelerinen ókil retinde 50 adam tartylmaqshy.
