Almatyda VI Respýblıkalyq ınnovatsııalyq-pedagogıkalyq ıdeıalar festıvali ashyldy
ALMATY. 18 jeltoqsan. QazAqparat /Erbol Turymbetov/ - Búgin Almatyda «Alataý» shıpajaıy bazasynda VI Respýblıkalyq ınnovatsııalyq-pedagogıkalyq ıdeıalar festıvaliniń saltanatty ashylý rásimi boldy.
Sharany «Daryn» respýblıkalyq ǵylymı-tájirıbelik ortalyǵy uıymdastyryp otyr. Konferentsııa bilim berý uıymdarynda oqý-ádistemelik jumystardy jetildirý jáne psıhologııalyq-pedagogıkalyq tájirıbeniń ǵylymmen baılanysyn nyǵaıtý, ınnovatsııalyq tehnologııalardy engizý, úzdik tájirıbelerdi taratý, daryndy balalarmen jumys júrgizýde pedagogtardyń jeke kásibı daıarlyǵyn arttyrý bolyp tabylady.
«Daryn» respýblıkalyq ǵylymı-tájirıbelik ortalyǵynyń dırektory Dildash Bıtýova sharanyń jyldan- jylǵa qarqyn alyp kele jatqanyn atap ótti. «Festıval alǵash ret 2001 jyly ótkizilgen bolatyn. Onda nebári 74 qatysýshy bolyp edi. Eki jylda 1 ret ótkizilip kele jatqan sharanyń búginde aýqymy keńeıgen. Bul oraıda bizdiń barlyq muǵalimderimizdiń qajyrly eńbegin atap ótkim keledi», dedi ol.
Festıvalǵa 3 jyldan kem emes ınnovatsııalyq qyzmetpen aınalysatyn pedagogıkalyq qyzmetkerler, mektepke deıingi jáne jalpy orta bilim berý, qosymsha orta bilim berý uıymdarynyń ujymdary, oblystardyń, Astana jáne Almaty qalalary pedagogıkalyq kadrlardyń bilimin jetildirý jáne qaıta daıarlaý ınstıtýttarynyń 184 pedagogy qatysýda.
Shara matematıka, jaratylystaný ǵylymdary, gýmanıtarlyq pánder, óner mektepteri jáne psıhologııa atty 5 sektsııa boıynsha ótýde.
Erteń jabylatyn festıval qatysýshylaryna sertıfıkattar tapsyrylady. Jeńimpazdar men júldegerler Qazaqstan Respýblıkasy Bilim jáne ǵylym mınıstrliginiń Qurmet gramotalarymen, I, II, III dárejeli dıplomdarymen marapattalady.
