Almatyda VI Halyqaralyq PR forým ótip jatyr
ALMATY. Mamyrdyń 12-si. QazAqparat /Erlik Erjanuly/ - Memleket júzege asyratyn jobalar men bastamalar árqashanda qoǵam tarapynan túsinistik pen qoldaýǵa ıe bola bermeıdi. Bul búgin Almatyda óz jumysyn bastaǵan VI Halyqaralyq PR forýmda jan-jaqty talqylanyp jatyr,
dep habarlaıdy QazAqparat.
Qazaqstandaǵy PR kúnderi aıasynda ótip jatqan bul sharany "PR-shy" klýby PR Communications konsaltıng agenttigimen birlesip uıymdastyrdy. Agenttiktiń bas dırektory Ásel Qaraýlovanyń aıtýynsha, memleket júzege asyratyn jobalar men bastamalar elimizdiń bolashaǵynda úlken yqpalǵa ıe. Ókinishke qaraı, ol árdaıym qoǵam tarapynan qoldaý taba bermeıdi. Sondyqtan da bul forým "Jaýapkershilik kommýnıkatsııasy: bolmys pa, álde uqsastyq pa" degen taqyryppen ótip jatyr. Alys-jaqyn shet elderden 200-ge jýyq kommýnıkatsııa mamandarynyń basyn qosqan forýmda alǵashqy kúni ICC Advisors agenttiginiń qoldaýymen ázirlengen "Kommýnıkatorlar baromotri" taqyrybyndaǵy zertteý nátıjeleri tanystyrylady. "Asa iri memlekettik jobalar kommýnıkatsııasy" jóninde pikirsaıys jasalyp, "2010-2020 jyldardaǵy Qazaqstannyń aqparattyq keńistigi" jáne "Qarjy naryǵyndaǵy kommýnıkatsııa: klıentke oralý" dep atalatyn jeke májilister bolady. Sondaı-aq arnaıy sheberlik dáristeri josparlanyp otyr.
