Almatyda velosherý ótetin kúni birqatar jol baǵyttary jabylady
ALMATY. QazAqparat - «Sporttyq Almaty» qalalyq baǵdarlamasy aıasynda ótetin tórtinshi velosherý 21-shi mamyrǵa belgilendi, syılyqqa velosıped beriledi. Jarys kúni birqatar joldar jartylaı jabylady, dep habarlaıdy QazAqparat tilshisi qalalyq Dene shynyqtyrý jáne sport basqarmasyna silteme jasaı otyryp.
Dástúr boıynsha velosherý áýesqoılary saǵat 08:30-da «Nurly Taý» bıznes ortalyǵy mańynda jınalyp, uıymdastyrýshylardan nómirler alady. Ol nómirler arqyly márede baǵaly syılyqtar oınatylatyn lotereıaǵa qatysýǵa bolady. Osy joly, velosıpedshiler 13 shaqyrymdy júrip ótedi. Velosherýge qatysýshylar Ál-Farabı kóshesinen batys baǵytta Rozybakıev kóshesine deıin, sodan soń Abaı dańǵylyna deıin túsip, qalamyzdyń ortalyq saıabaǵynda márege jetedi. Dál osy baǵytta joldar jartylaı jabylady.
«Ál-Farabı kóshesinen batys baǵytta Rozybakıeva kóshesine deıin, sodan soń Abaı dańǵylymen ortalyq saıabaqqa deıingi joldar az ýaqytqa jabylady. Sportshylar ótip ketisimen birden ashylady. Sońǵy qatysýshy máre syzyǵyna jetkende joldar ashylady. Márede lotereıa oıyny uıymdastyrylyp, baǵaly syılyqtar oınatylady jáne kontserttik baǵdarlama uıymdastyrylady. Dástúr boıynsha, sportshylardyń biri basty syı - velosıpedtiń ıegeri atanady. Qatysýshylar qorǵanysh shlemin kııýi shart», - dedi vedomstvonyń baspasóz hatshysy Aıdana Ádilbekova.
Aıta keteıik, atalǵan velosherý «Sporttyq Almaty» qalalyq baǵdarlamasynyń qoldaýymen osymen tórtinshi ret ótkizilgeli otyr. Jalpy, bıyl 20 velosherý ótkizý josparlanǵan.
