Almatyda velosherý maýsymy ashylatyn kún belgili boldy
ALMATY. QazAqparat - Sáýirdiń 16-y kúni Almatyda «Sporttyq Almaty» baǵdarlamasy aıasynda Velosherý maýsymynyń ashylý saltanatyna baılanysty velosherý ótedi, dep habarlaıdy QazAqparat tilshisi Almaty qalasynyń Dene shynyqtyrý jáne sport basqarmasyna silteme jasaı otyryp.
Atalǵan basqarmanyń habarlaýynsha, qatysýshylar 16 sáýirde saǵat 08:30-da jınalady. Al velosherý 09:00-de «Nurly-Taý» bıznes ortalyǵy mańynan bastalyp, Tuńǵysh Prezıdent saıabaǵy tóńireginde aıaqtalady. Jalpy sol jerden áýesqoılar batys baǵytta 9 shaqyrymdyq joldy júrip ótedi.
Velosherýdiń saltanatty ashylý rásimine qala turǵyndarymen qatar, Qazaqstannyń áıgili sportshylary men ártisteri qatysady. Atap aıtatyn bolsaq, pankratıonnan úsh dúrkin álem chempıony Ardaq Nazarov, aýyr atletıkadan álem chempıony Jasulan Qydyrbaev, Olımpıada oıyndarynyń kúmis júldegeri, QR eńbek sińirgen jattyqtyrýshysy Dáýlet Turlyhanov, erkin kúresten Olımpıada oıyndarynyń kúmis júldegeri Islam Baıramýkov, bokstan Olımpıada chempıony Ermahan Ibraımov, bokstan eki dúrkin álem chempıony Nazym Qyzaıbaı, mánerlep syrǵanaýdan Qazaqstan chempıonatynyń kúmis júldegeri, Ýnıversıada - 2017 qatysýshysy Aıza Imambek, shahmatshy, grossmeıster Jansaıa Ábdimálik, «Qazaqstan Barysy-2015» kúmis júldegeri Rýslan Abdrazaqov, taý týrızminen TMD ashyq chempıonatynyń chempıony (2001-2003) Maqsut Jumaev, sondaı-aq, qazaqstandyq estrada juldyzdary Daýt Shaıhıslamov, Aıqyn Tólepbergen, Álııa Ábilqaıyr, «Asyl» jáne «Melomen» toptary qatysady.
Sonymen qatar, velosherý bastalmas buryn, qatysýshylar arnaıy nómirlerin alyp, sol arqyly márede baǵaly syılyqtar oınatylatyn lotoreıaǵa qatysa alady. Basty syılyq - elektr toǵymen júretin velosıped. Odan bólek, kelgen qonaqtar men qatysýshylar Almaty qalasynyń namysyn qurlyqaralyq velododalarda qorǵaıtyn «Apple Team» jańa kásipqoı velokomandasyn tanystyrý rásimin tamashalap, veloshabandozdarmen tanysady.
Almaty qalasynyń Dene shynyqtyrý jáne sport basqarmasynyń habarlaýynsha, «Sporttyq Almaty» qalalyq baǵdarlamasynyń aıasynda megapolıste 20 velosherý ótpek, sonyń ishinde túngi velosherý de bar. Qaýipsizdik maqsatynda, mindetti talap retinde qatysýshylarda qorǵanysh shlemi bolý qajet.
Esterińizge sala ketsek, almatylyq velosherýler 2009 jyly bastalǵan, sol jyly 300-ge jýyq adam qatysqan. Sodan beri qatysýshylar sany ósip, sońǵy jyldary tanymaldylyǵy artyp keledi. 2014 jyly Qazaqstannyń velosıped sporty 100 jyldyǵyn atap ótti!
Aıta keter jaıt, ótken jyly «Sporttyq Almaty» qalalyq baǵdarlamasynyń aıasynda 21 velosherýlerge 19 000-nan astam adam qatysqan.
