Almatyda vaktsınalaý jumystary qalaı júrip jatyr
ALMATY. QazAqparat- Almaty qalalyq Qoǵamdyq densaýlyq saqtaý basqarma basshysynyń orynbasary mindetin ýaqytsha atqarýshy Laýra Myrzaǵalı onlaın brıfıng barysynda halyqqa vaktsına salý jumysy qalaı júrgizilip jatqanyn aıtyp berdi, dep habarlaıdy QazAqparat tilshisi.
Onyń aıtýynsha, vaktsınatsııalaý úshin medıtsınalyq uıymdarda, mektepterde, mádenıet oryndarynda, bazarlar men qalanyń saýda ortalyqtarynda 200-den astam egý pýnkti iske qosylǵan, sondaı-aq kóshpeli pýnktter de jumys isteıdi. Qaladaǵy 214 vaktsına pýnktinde 1 282 medıtsına qyzmetkerinen quralǵan 315 brıgada bar.
«Búgingi kúni barlyǵy 270 568 adam vaktsına saldyrdy. Onyń ishinde 19 435-i quqyqqorǵaý organy qyzmetkerleri, 27 myńnan astam medıtsına mamandary, taǵy 20 myńdaı pedagog vaktsına aldy. Oǵan qosa dıspanserlik esepte turǵandar men stýdentter, zeınetkerler, 60 jastan asqan adamdar jáne qala turǵyndary óz erikterimen vaktsına salydyrýda», - dedi ol.
Sonymen qatar ol 9 transh boıynsha qalaǵa vaktsınanyń 302 985 dozasy jetkizilgenin aıtty.
«Jalpy kólem boıynsha otandyq QazVac vaktsınasynyń birinshi transhy 3 myń dozany quraıdy, qytaılyq Sinopharm vaktsınasynyń alǵashqy jetkizilimi 15 myń doza. Qalada birinshi komponent boıynsha 37 417 doza, al ekinshi komponent boıynsha 78 444 doza bar», - dedi Laýra Myrzaǵalı.
