Almatyda vaktsınaǵa kvotany ulǵaıtamyz – ákim
ALMATY. QazAqparat - Almatyda «Spýtnık-V» kvotasy ulǵaıtylady. Bul týraly Almaty ákimi Baqytjan Saǵyntaev «Akimat live» tikeleı efır barysynda málim etti, dep habarlaıdy QazAqparat tilshisi.
«Qazir reseılik «Spýtnık-V» vaktsınasyn egý júzege asyrylyp jatyr. Aqpanda biz 1750 vaktsınany quraıtyn alǵashqy partııany aldyq. Aqpanda vaktsınanyń basym bóligin medıtsına qyzmetkerleri ekti. Naýryzdyń basynda 10800 doza alyndy. Ol medıtsına qyzmetkerleri, ustazdar men polıtsııa qyzmetkerlerine egildi. Qolda bar vaktsınanyń barlyǵy iske jarady. Sáýirde vaktsınanyń iri kólemi túsýi kerek. Bizge bólingen kvota sany 65 myń boldy. Biraq men keshe Premer-Mınıstrmen sóılesip, 65 myń kvota az ekenin aıttym. Premer-Mınıstr bul sózimmen kelisti. Jaqyn arada biz kvota sanyn arttyramyz», - dedi Saǵyntaev.
Sonymen qatar, Almaty ákimi vaktsınatsııa boıynsha mobıldik brıgadalar jumys isteıtinin aıtty.
«Búgin birqatar kásipker óz alańdaryn usyndy. Bul uıymdastyrylǵan túrde júzege asyrylýy kerek. Aýqymdy jumys júrgizilip jatyr. Biz qalada jappaı vaktsınatsııany bastaýǵa daıynbyz. Tek shekteý sharalarymen alysqa barmaımyz. Biz bir jyl boıy bul tájirıbeni qoldanyp kelemiz. Karantınge jabamyz, tótenshe jaǵdaı jarııalaımyz. Biraq vırýs ózgerip jatyr», - dedi qala ákimi.
Saǵyntaev vırýstana vaktsına ǵana qutqaratynyn jetkizdi.
«Tek vaktsına ǵana qutqara alady. Sondyqtan jappaı vaktsınalaýǵa túsinistikpen qaraýǵa shaqyramyn. Ujymdyq ımmýnıtet qalyptassa, qalypty ómirge oralamyz. Osydan basqa jol joq ekenin biz ǵana emes, búkil álem kórip otyr», - dedi Almaty Baqytjan Saǵyntaev.
