Almatyda vaktsınatsııa pýnktindegi prank: Tanymal bloger jazalanýy múmkin

ALMATY. QazAqparat - Qazaqstandyq tanymal bloger Meıirjan Tórebaev medıtsına qyzmetkerlerine prank jasaǵany úshin jazalanýy múmkin», dep habarlaıdy QazAqparat tilshisi.

Vaıner Instagram-daǵy paraqshasynda dárigerlerge prank jasaǵan vıdeosyn jarııalady. Almaty qalalyq qoǵamdyq densaýlyq saqtaý basqarmasynyń málimetinshe, beınejazbadaǵy medıtsına qyzmetkerleri №4 qalalyq emhanada jumys isteıdi.

«Emhana basshylyǵy quzyrly organdarǵa ákimshilik jaýapkershilik sharasyn qoldaný týraly ótinish jiberedi. Sebebi adamdardyń densaýlyǵy men densaýlyq saqtaý júıesi týraly kodeks memlekettik organdar men laýazymdy tulǵalardyń medıtsına qyzmetkeriniń kásibı qyzmetine aralasýyna tyıym salady», - dep habarlady Almaty qalalyq qoǵamdyq densaýlyq saqtaý basqarmasynyń baspasóz qyzmeti.

Sondaı-aq, vedomstvo Ákimshilik kodekstiń 80-1-baby 2-tarmaǵy «Medıtsına qyzmetkerleriniń zańdy qyzmetine kedergi jasaý» týraly da eske saldy.

«Bul mindetin oryndap jatqan medıtsına qyzmetkerine qurmetsizdik tanytý kórinisi, uıatsyz sózder, ádepsiz qımyldar, belgiler men zattardy kórsetý, sonyń ishinde buqaralyq aqparat quraldaryn nemese telekommýnıkatsııa jelisin qoldaný, ádepsiz minez-qulyq, qorlaý. Bap sanktsııasy 30 AEK mólsherinde aıyppul salýdy nemese 10 táýlikke deıin qamaýǵa alýdy kózdeıdi», - dep tolyqtyrdy basqarmadaǵylar.