Almatyda vaktsına alǵandardy qalaı anyqtaıdy
ALMATY. QazAqparat - Belgili bir salalarda qyzmetkerlerdiń vaktsına alǵany kadr bólimi arqyly tekseriletin bolady. Bul týraly Almaty qalasynyń bas sanıtarlyq dárigeri Jandarbek Bekshın aıtty, dep habarlaıdy QazAqparat tilshisi.
«Tekserýdi aýrýhana epıdemıologtarynyń ózderi júrgizedi, bizde de baqylaý pýnktteri bar. 15 shildeden keıin monıtorıngtik toptardyń jumysy bas sanıtarııalyq dárigerdiń barlyq kontıngentti vaktsınalaý týraly 31-shi qaýlysynyń oryndalýyn baqylaýǵa baǵyttalady. Árıne, ishinara tekserister bolady», - dedi Jandarbek Bekshın.
Sonymen qatar, ol qyzmetkerlerdiń vaktsına alǵanyn nemese almaǵanyn qalaı tekserýge bolatynyn aıtty.
«Kez kelgen mekemeniń kadr bólimi bar, qyzmetkerlerdiń tizimi bar, málimetter bazasyn qaraýǵa bolady. Barlyq qyzmetkerdi jeke tekserý bolmaıdy, jumystaryna kedergi jasalmaıdy. Tsıfrlyq tehnologııalarymyz bul jumysty júrgizýge múmkindik beredi», - dedi ol.
Onyń aıtýynsha, eger bir kompanııanyń eldiń bas sanıtarııalyq dárigeriniń buıryǵyn oryndamaıtyny anyqtalsa, onda onyń jumysyn toqtatýǵa deıingi sharalar qoldanylady. Biraq aldymen túsindirý jumystary júrgiziledi.
