Almatyda vaktsına alǵan stýdentter Túrgen men Kólsaıǵa joldama aldy
Koronavırýsqa qarsy ekpe alǵan Qazaq ulttyq agrarlyq zertteý ýnıversıtetiniń bakalavrıat, magıstrant jáne doktorant stýdentteri Túrgen jáne Kólsaı qoryqtaryn kórýge múmkindik aldy. Bul týraly ýnıversıtettiń tárbıe jáne áleýmettik jumys jónindegi prorektory Janar Dáýrenbaeva aıtty.
Bul «jasyl» mártebesi bar stýdentterdiń ekinshi sapary. 15 tamyzda ýnıversıtet júzdegen stýdentke Túrkistan qalasyna joldama bergen. Olar jańa Kerýen saraıdy kórip, tarıhı oryndarǵa saıahat jasady.
«Bizde stýdentterdiń 90%-dan astamy tegin bilim alady, sondyqtan biz stýdentterdi oqýǵa jeńildik jasap emes, kıeli Túrkistanǵa barýdy oılastyryp, olar úshin tımbıldıng uıymdastyrýdy uıǵardyq. Osy senbide balalar Almaty oblysynyń basqa da qoryqtaryn aralaıdy», - deıdi Janar Dáýrenbaeva.
Onyń aıtýynsha, joǵary oqý ornynda 7 608 stýdent oqıdy, onyń 1 030-y medıtsınalyq kórsetkish boıynsha vaktsına almady. 18 jasqa tolmaǵan 1016 stýdent bar.
«Olardyń qolynda dárigerler bergen anyqtama boldy, búginde olar kezekpen egilip jatyr. Ýnıversıtette 2 egpe pýnkti ashyldy. Stýdentterge vaktsınatsııa ornyna barýdyń qajeti joq, bul - óte yńǵaıly», - dep atap ótti prorektor.
