Almatyda vagon-tsısternalardyń relsten shyǵyp ketýi sebebi belgili boldy
Esterińizge sala ketelik, 24 mamyr kúni Almatyda 16 saǵat 45 mınýtta Túrkisib aýdanynyń «Juldyz» yqshamaýdany tusynda júk poıyzynyń avıatsııalyq kerosın toltyrylǵan 5 vagon-tsısternasy relsten shyǵyp ketken bolatyn.
«Vagon-tsısternalardyń shoıyn joldan shyǵyp ketýine relsterdiń tehnıkalyq jaǵdaıynyń qanaǵattanarlyq sıpatta bolmaǵandyǵy sebep boldy. QR «Temirjol transporty týraly» zańyna sáıkes, joldardyń kútimine jeli ıesi jaýap beredi. Oqıǵa ornyna Almaty-1 temir jol stansasynan órt sóndirýshileri men relsterdi qalpyna keltirýshi poıyzy jóneltildi», - dep atap kórsetilgen kompanııanyń bergen resmı jaýabynda.
Sonymen qatar, «QTJ»UQ» AQ buǵan deıin de menshik ıelerine qarasty birqatar kireberis temirjoldardyń qanaǵattanarlyqsyz kúıde ekendigi, sonyń saldarynan poıyzdardyń relsten shyǵyp ketýi múmkin ekendigi týraly jeli ıelerine talaı ret eskertý jasap, quzyretti organdarǵa da habarlaǵan eken.
Bıylǵy jyldyń basynan beri elimizde menshik ıeleriniń kireberis temirjoldarynda jyljymaly quramnyń relsten shyǵyp ketýine qatysty 81 oqıǵa tirkelipti. Solardyń ishinde 12 oqıǵa, Almaty qalasynyń temirjol jelisine jalǵasatyn, biraq ortaq qoldanystaǵy emes kireberis jelilerde bolǵan.
Aıta ketelik, oqıǵa oryn alǵan № 673-shi biriktirýshi jeli «QTJ»UQ» AQ tıesili emes. Ol «PPJT» JShS menshigindegi jeli. Sáıkesinshe, bul shoıyn joldaǵy barlyq manevrlik jumystardy osy jeke kompanııanyń jumysshylary atqarady.
Al relsten shyǵyp ketken vagon-tsısternalar qaıtadan shoıyn jolǵa qoıylyp, qalpyna keltirildi. Bir qýanarlyǵy, zardap shekkender joq jáne avıatsııalyq kerosın tógilmegen.
