Almatyda V qysqy spartakıada saltanatty túrde ashyldy
ALMATY. QazAqparat - Almatyda Qazaqstan Respýblıkasy V qysqy spartakıadasynyń saltanatty ashylýy ótti, dep habarlaıdy QazAqparat tilshisi.
«Almaty Arena» sport saraıynda ótken spartakıadanyń saltanatty ashylý rásiminde QR Mádenıet jáne sport vıtse-mınıstri Serik Jarasbaev quttyqtaý sóz sóıledi.
«Sizder bilesizder, spartakıada tórt jylda bir ret ótedi. Bul tórtjyldyqtyń basty jarysy - Olımpıada oıyndarynyń aldynda sport túrleri boıynsha ulttyq quramaǵa irikteıtin iri keshendi is-shara. Spartakıadany alǵash ret bir qalada, bir jerde ótkizýge múmkindigimiz bar ekeni qýantady. Uıymdastyrýshylarǵa alǵys aıtqym keledi», - dep quttyqtaǵan ol Qazaqstan Respýblıkasynyń V qysqy spartakıadasyn ashyq dep jarııalady.
Sondaı-aq, almatylyqtar men sportshylardy Almaty qalasy sport basqarmasynyń basshysy Rústem Baıseıtov, QR UOK sport dırektsııasynyń dırektory Elsııar Qanaǵatov quttyqtady.
Osydan soń elimizdiń 16 oblysy men 3 qalasynan kelgen 1300-ge jýyq myqty sportshylar sport saraıynyń ortasymen júrip ótti.
Kelesi kezekte sportshylar atynan konkımen júgirýshi Qudaıbergen Temirjanov:
«Biz ádildik jáne teńdik rýhyndaǵy erejelerdi qurmetteı jáne saqtaı otyryp, Spartakıadaǵa qatysýǵa ýáde beremiz», - dep ant berse, ádilqazy alqasy atynan shańǵydan joǵarǵy sanatty tóreshi Ábilqaıyr Nurqanov jarystyń ádil ótýine ant berdi.
Saltanatty shara óner juldyzdarynyń qatysýymen merekelik baǵdarlamaǵa ulasty.
Eske sala keteıik, V qysqy spartakıadanyń ashylý saltanatynyń aldynda baspasóz máslıhaty ótken bolatyn.
