Almatyda V «Qalamger Azamat» jas tilshilerdiń respýblıkalyq forýmy ótedi
ALMATY. 18 qyrkúıek. QazAqparat - Almatyda 25-27 qyrkúıek kúnderi «El eńsesi - Egemendik» degen atpen V «Qalamger Azamat» jas tilshilerdiń respýblıkalyq forýmy bolady.
Onyń basty maqsaty - jastardy otansúıgishtikke, eljandylyqqa shaqyra otyryp, óskeleń urpaqtyń kásibı biliktiligin shyńdaıtyn zamanaýı jetistikterdi meńgerýge múmkindik týǵyzý. Aqparattyq tájirıbe almasý baǵytynda túrli salada qalam terbeýge, jýrnalıstıkanyń qyr-syryn úırenýge talpynǵan jas býynnyń basyn qosyp oı bólisý bolyp tabylady.
«Qalamger Azamat» jas tilshiler qoǵamdyq qorynyń jetekshisi Aıdar Qyryqbaıdyń aıtýynsha, bul forýmnyń tusaýy 2008 jyly Almaty qalasynda kesilgen bolatyn. Oǵan 18 ben 25 jas aralyǵyndaǵy jas jýrnalıster qatysady. Bıyl bul shara Táýelsizdik monýmentine gúl shoǵyn qoıý rásiminen bastalmaq. Respýblıkanyń túkpir-túkpirinen 100-ge jýyq delegat qatysatyn forýmnyń ashylý saltanatyna qala ákimdigi men birqatar buqaralyq aqparat quraldarynyń basshylary qurmetti qonaq retinde qatysqaly otyr. Olar qoǵam qaıratkerlerimen kezdesip, «Qazaq tildi baspasóz basylymdarynyń damýy jáne Qazaq ǵalamtorynyń búgingi kórinisi», «Telebaǵdarlamalar men jańalyqtar qyzmetindegi jańashyldyqtar, «Tikeleı efır mádenıeti» taqyryptary boıynsha semınar-trenıngterge qatysady.
