Almatyda V. Fesenkov atyndaǵy Astrofızıka ınstıtýtynda aına dıametri 1 metrlik teleskop iske qosyldy
ALMATY. Tamyzdyń 24-i. QazAqparat /Erbol Azanbek/ - Búgin V.Fesenkov atyndaǵy Astrofızıka ınstıtýtynyń Tıan-Shan rasythanasynyń ókilderi aına dıametri bir metrlik teleskoptyń iske qosylǵandyǵyn habarlady.
Observatorııanyń jetekshisi Keńes Muratovtyń aıtýynsha, jobanyń maqsaty TShAO teleskopynyń ózindik avtomattandyrylǵan basqarý júıesin qurý, jasaý, ornatý. Sonymen birge, teleskoppen jumys isteýdi qashyqtan oqytý men naqtyly qadaǵalaýdy oqytýdyń avtomattandyrylǵan júıesin qoldaný. «Jobanyń mańyzdylyǵy sol, qashyqtan basqarý arqyly qazirgi ýqyttaǵy mańyzdy másele - alys-jaqyn keńistiktegi obektilerdi zertteýge múmkindik beredi. Jańa júıeni qoldaný birinshiden, teleskoptar jumysynyń tıimdiligi men tapsyrma oryndaý kólemin arttyrady. Ekinshiden, oqytý men aǵymdaǵy jumysty ınternet arqyly alystan júrgizý, tutynýshylar keńistigin arttyrý jáne joıylǵan paıdalanýshylardyń qaıta jumys júrgizýine múmkindik týady», dedi K. Muratov.
Qurylǵynyń aına dıametri 1 m, Rıchı Krıten fokýsy - 13 m. Bul teleskoptyń montajy 80-shi jyldardyń ortasynda bastalǵan. Odaqtyń ekonomıkalyq deńgeıi qulaǵannan keıin jáne 1990 jyly Germanııanyń birigýi kezinde onyń montaj jumystary toqtap qalǵan. Osy kúnge deıin onyń optıkasy men mehanıkasy qurastyryp qoıylǵan edi.
2009 jyly «Granıt» SKTB AAQ maket úlgisin jasaý kelisimi bekitildi. Bul maqsatta «Kosmostyq zertteýler men tehnıkalardyń ulttyq ortalyǵy» 2 mln. teńge qarajat bóldi. «Granıt» SKTB AAQ basqarý júıesiniń barlyq syzbalaryn jasap shyǵardy, PS 232/PS485 aýysym qurylǵysyn jáne jekeleı blogtardy mıkrobaqylaǵyshtar arqyly basqarý jumystaryn júzege asyrdy. Qazirgi ýaqytta josparlanǵan jumystardyń tolyq oryndalýynan soń teleskoptyń barlyq qyzmetteri avtomattandyryldy. Qabyldaý-tirkeý apparatynyń jandanýy men ǵalamtor jelisine qosylǵannan keıin ornatylǵan syzba Jerdiń kez kelgen núktesinen baqylaý júrgizýge múmkindik týǵyzady.
