Almatyda V «DIDAR» Respýblıkalyq jastar kınofestıvali ótedi
/strong>Sáýirdiń 14-i. QazAqparat / Ádilet Musahaev / - Aǵymdaǵy jyldyń 16-17 sáýirinde Almatydaǵy «Rodına» kınoteatrynda V «DIDAR» Respýblıkalyq jastar kınofestıvali ótedi. Bul jaıynda búgin arnaıy ótken baspasóz máslıhatynda aıtyldy,
dep habarlaıdy QazAqparat.
Bıylǵy festıval «Jańa onjyldyq - qazaqstan jastarynyń jańasha serpilisi» uranymen jáne VII qysqy Azııa oıyndaryn nasıhattaý men Qazaqstannyń EQYU tóraǵalyq etý qurmetine oraı ótpek.
«Osy jylǵy shara 18 atalym boıynsha ótedi, onyń basty tórteýi kórkem, derekti fılm, mýzykalyq klıp jáne anımatsııalyq fılm. Sonymen qatar jeńimpazdarǵa arnaıy músinshe men dıplom jáne syılyqtar daıyndadyq», deıdi joba avtory Daýren Muhamedjanov.
«DIDAR» festıvaliniń art-dırektory Nazıra Muqyshevanyń aıtýynsha, konkýrsqa 146 jumys kelip túsken, onyń 86-sy eki kúndik sharada kórsetiletin bolady. «Elimizdiń Semeı, Qyzylorda, Shymkent, Astana sııaqty ár túkpirinen kóptegen jumystar keldi. Osy jyly anımatsıalyq jáne derekti fılmderdiń kóptep kelýi bizdi qýantyp otyr», deıdi N.Muqasheva.
Festıvaldi Almaty qalasy Jastar saıasaty jónindegi basqarmasy men «DIDAR» prodıýserlik ortalyǵy» qoǵamdyq qory uıymdastyryp otyr. Sonymen qatar Almaty qalasy ákimdigi, QR Mádenıet mınıstrligi, Aqparat jáne baılanys mınıstrligi, Bilim jáne ǵylym mınıstrligi men «Nur Otan» HDP qoldaý kórsetken.
