Almatyda úzdik meıirbıkeler marapattaldy
ALMATY. QazAqparat - Almatyda búgin Halyqaralyq medbıkeler kúnine oraı ótken merekelik shara barysynda qalanyń úzdik meıirbıkeleri anyqtaldy.
Saltanatty jıyn barysynda 18 úzdik mamanǵa arnaıy gramota tabys etildi. Jeńimpazdardyń barlyǵy 100 myń teńgeden syılyq alsa, qatysýshylardyń barlyǵy 30 myń teńge kóleminde yntalandyrý syılyǵyna ıe boldy. Bul týraly qalalyq Densaýlyq saqtaý basqarmasynyń baspasóz qyzmeti habarlady.
Qatysýshylardyń teorııalyq bilimi sımýlıatsııalyq ortalyqta tekserilip, medıtsınalyq uıymdardyń bas dárigerlerinen quralǵan konkýrstyq komıssııamen suhbat júrgizildi.
Aıta ketý kerek, kásibı mereke qarsańynda Almatydaǵy barlyq medıtsınalyq mekemelerde túrli is-sharalar ótti. Olardyń basty maqsaty meıirger mamandarynyń statýsy men mártebesin arttyrýǵa, olardyń kásibı jáne jeke qasıetterin úzdiksiz jetildirýge jaǵdaı jasaý.
«Elimizdiń memlekettik saıasattynda alǵashqy basymdyq halyq densaýlyǵyn qorǵaýǵa baǵyttalǵan. Qazirgi tańda bul maqsatqa kol jetkizý densaýlyq saqtaý salasynyń turaqtylyǵy men tıimdi damý jaǵdaıynda ǵana múmkin ekeni belgili. Halyqqa kórsetiletin medıtsınalyq kómektiń sapasy onyń ýaqytyly kórsetilýi, aldyn-alý sharalarynyń, emdeý men qaıta qalpyna keltirýdiń durystyǵy arqyly belgilense, bul komponentterdi sátti júzege asyrylýynyń negizi - meıirbıkeniń eńbegi, onyń kásibı sheberligi bolyp tabylady. Búgingi kúni meıirger mamandardyń áleýmettik mıssııasy izgilik jáne meıirimdilikpen ǵana shektelmeıdi, olar halyq densaýlyǵyn saqtaýda, medıtsınalyq kómektiń qoljetimdiligi men ońtaılylyǵyn arttyrýda mańyzdy ról oınaıdy», - dedi qalalyq Densaýlyq saqtaý basqarmasy basshysy orynbasarynyń mindetin atqarýshy Janar Kenjebaeva.
Basqarmanyń málimetine sensek, qalada 9 myńǵa tarta orta medıtsınalyq qyzmetker jumys istep keledi. Olardyń 2 myńy meıirbıke isi boıynsha joǵary bilimge ıe.
