Almatyda «Úzdik ınjener-2015» baıqaýynyń jeńimpazdary marapattaldy
ALMATY. QazAqparat- Almatyda Dostyq úıinde keshe «Úzdik ınjener-2015» respýblıkalyq baıqaýynyń jeńimpazdaryn marapattaý rásimi boldy. Baıqaýdyń uıymdastyrýshysy - QR Ulttyq ınjenerlik akademııasy.
«Bizdiń oıymyzsha, álemdegi eń damyǵan 30 eldiń qataryna ený jolynda basty mamandyq ıeleriniń biri - ınjener.
Sondyqtan, bul baıqaý ınjenerlik kadrlardyń mártebesin nyǵaıtýǵa jáne ındýstrıaldy jobalardy júzege asyrýǵa qomaqty úles qosqan mamandardy yntalandyrýǵa baǵyttalǵan», - dedi óz sózinde QR Ulttyq ınjenerlik akademııasynyń prezıdenti Baqytjan Jumaǵulov.
Baıqaýǵa Qazaqstannyń barlyq óńirinen 350 úmitker usynylǵan bolatyn. Ádilqazylar alqasynyń sheshimi boıynsha 11 jeńimpaz tańdap alyndy. Olardyń ishinde «Oral zaýyty» AQ bas konstrýktory Haıdar Habıbýlın de bar.
«Men «Shekaralyq jáne zymyran-artıllerııalyq kemelerdiń paıdalaný sıpatyn jańǵyrtý jáne jaqsartý» dep atalatyn jobam úshin marapattaldym. Keme jasaý - eń kúrdeli salalardyń biri. Alaıda, bizdiń zaýyttyń damý deńgeıin joǵary dep aıtýǵa bolady. Sondyqtan da biz bolashaqqa senimmen qaraımyz. Al mundaı baıqaýlar tehnıkalyq baǵyttaǵy mamandardy yntalandyrady jáne ınjenerlik isti nasıhattaıdy», - dedi H. Habıbýlın.
Sondaı-aq, «Almaty Kópirli Qurylym Zaýyty» JShS basqarmasynyń tóraǵasy Ahmetjan Shardınov ta dıplom jáne medalmen marapattaldy. Ol TMD aýmaǵynda teńdesi joq - uzyndyǵy 42 metr bolatyn temirbetondy arqalyq zerttemesin ázirlegen.
«Álemdik qarjy daǵdarysy ýshyǵyp tursa da bizdiń Prezıdentimiz eldiń ındýstrıaldy-ınnovatsııalyq damý salasyna kóp kóńil bóledi. ıAǵnı, ınjenerler kerek degen sóz. Árıne, mundaı baıqaýlar ınjenerlik mamandyqtyń damýyna septigin tıgizedi», - dedi A. Shardınov.
