Almatyda úzdik áleýmettik jarnama tańdaldy
ALMATY. QazAqparat - Almatyda úzdik jarnamaǵa konkýrstyń qorytyndysy shyǵaryldy. Ony «Baýyrjan» qaıyrymdylyq qory uıymdastyrdy.
«Make It Clear!» áleýmettik jarnama konkýrsy PRO (kásipqoılar) jáne FREE (áýesqoılar) atalymdarynda 70-ten astam jumysty jınady.
PRO atalymynda Safar Shákeevtiń «Tabıǵatty súıemiz, Qazaqstandy súıemiz!» jáne Ekaterına Týlıakovanyń «Almaty: Saýal boıynsha eshteńe tabylmady» atty jumystary jeńimpaz atandy.
FREE atalymynda Gleb Ponomarevtiń «Almaty. Jandanǵan kartınalar» beınerolıgi jáne Konstantın Vasenınniń «Rýlde otyryp túkiremin» plakaty jeńimpaz bolyp tanyldy.
Eske sala keteıik, konkýrs 2 qyrkúıekte bastalǵan bolatyn, oǵan tilek bildirýshilerdiń bárine múmkindik berildi. Eki aı boıy konkýrsqa qatysýshylar Qazaqstannyń túpkir-túpkirinen óz jumystaryn konkýrstyń resmı www.socreklama.kz saıtyna joldady.
Uıymdastyrýshylar óz aldyna otandyq áleýmettik jarnamany sapaly deńgeıge shyǵarý jáne ózekti áleýmettik problemalardy sheshýde onyń rólin arttyrý maqsatyn alǵa qoıdy.
«Áleýmettik jarnama bizdiń ómirimizde úlken ról atqarady, sanany ózgertedi, silkindirip, balalarymyzdy tárbıeleıdi. Jastarymyz, bizdiń jarnama agenttikterimiz kóbirek áleýmettik jarnamalar jasaǵanyn qalaımyz. Biz jaqsy jáne sapaly áleýmettik jarnamalar sanyn ulǵaıtý úshin osy jobany iske qostyq», - dedi «Baýyrjan» qorynyń negizin qalaýshy Juldyz Omarbekova.
Jeńimpazdardy quzyretti qazylar alqasy tańdady jáne olardyń arasynda tanymal qoǵam qaıratkerleri, jarnama salasyndaǵy kásibıler jáne jýrnalıster boldy.
PRO atalymynyń jeńimpazdary Eurobest-2015 (Belgııa) jáne Dubai Lynx-2015 (OAE) jarnama festıvaldaryna qatysady. Al ekinshi sanat boıynsha úzdik jarnama avtorlaryna baǵaly júldeler men syılyqtar tapsyryldy.
